ԵԽԽՎ ղեկավարը կոչ է արել հարգել Ծիծեռնակաբերդ չայցելելու իր որոշումը

նախագահ Մևլյութ Չավուշօղլուն (էթնիկ թուրք – «Նովոստի-Արմենիա») կոչ է արել հարգել Ծիծեռնակաբերդ չայցելելու իր որոշումը։

«ԵԽԽՎ կանոնակարգում չկա այնպիսի նորմ, որը պարտադրի նախագահին այցելել այս կամ այն վայրը... Սա իմ՝ որպես ԵԽԽՎ նախագահի, անձնական որոշումն է չայցելել այդ վայրը։ Ես հարգում եմ ձեր կարծիքը, բայց բոլորը պետք է հարգեն նաև իմ որոշումը»,- հինգշաբթի մամուլի ասուլիսում հայտարարել է Չավուշօղլուն։

Չավուշօղլուն նշել է, որ Հայաստան կատարած իրենց պաշտոնական այցերի ժամանակ Ծիծեռնակաբերդ չեն այցելել նաև ԵԽԽՎ նախկին նախագահներ Լուիս Մարիա դը Պուչը և Ռենե Վան դեր Լինդենը։

Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։

Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-