Հայ մասնագետները կմիանան Թուրքիայում գտնվող հնագույն Անի քաղաքի ավերակների ուսումնասիրությանը
Հայ մասնագետները կմիանան իրենց թուրք գործընկերներին, ովքեր զբաղվում են հնագույն Անի քաղաքի ավերակների ուսումնասիրմամբ, հինգշաբթի մամուլի ասուլիսում հայտարարեց «Ւկոմոս-Հայաստան» հասարակական կազմակերպության գլխավոր քարտուղար Հասմիկ Ազիզյանը։
Նա նշեց, որ հայկական կողմն ավելի վաղ մտահոգություն էր հայտնել Անիի Տիգրան Հոնենց հայկական եկեղեցու վերականգնման համար ընտրված ճարտարապետական մոտեցման կապակցությամբ, սակայն թուրքական կողմը հավաստիացնում է կանոնների լիակատար պահպանման մասին։ Այդ պատճառով, ասաց Ազիզյանը, հայ մասնագետները մտադիր են մասնակցել Անիի ավերակների ուսումնասիրությանը։
«Նախորդ տարվա հոկտեմբերին Հաագայի Պատմական արդարության և հաշտության միջազգային ինստիտուտը նախաձեռնել էր թուրք և հայ մասնագետների հանդիպում։ Հայաստանի կողմից հանդիպմանը մասնակցել է «Էրեբունի» թանգարան-արգելոցի տնօրեն, «Իկոմոս-Հայաստան» ՀԿ նախագահ Գագիկ Գյուրջյանը, իսկ թուրքական կողմից՝ «Անատոլու Քուլթուր» գործակալության ղեկավար Օսման Քավալան»,- ասաց Ազիզյանը։
Ըստ նրա՝ հանդիպման հիմնական նպատակը մշակութային երկխոսության ստեղծումն է պետությունների միջև պատմական հուշարձանների ուսումնասիրության և վերականգնման միջոցով։
Նա ավելացրեց, որ Անիում համատեղ հետազոտական աշխատանքների անցկացման հստակ ժամկետներն առայժմ հայտնի չեն և համաձայնեցման փուլում են։
Ինչպես նշեց Ազիզյանը, հայկական հնագույն մայրաքաղաք Անին ընտրվել է այն պատճառով, որ հենց այդ հնագույն քաղաքում ՅՈՒՆԵՍԿՕ-ի և ՄԱԿ-ի Զարգացման ծրագրի (UNDP) շրջանակներում Թուրքիայի մշակույթի նախարարության աջակցությամբ աշխատանքներ են տարվում 13-րդ դարի Տիգրան Հոնենց և Մանուչերի մզկիթի վերականգնման ուղղությամբ։
«Իկոմոս-Հայաստան» հասարակական կազմակերպությունը ստեղծվել է 2002 թվականին և Հուշարձանների ու տեսարժան վայրերի պահպանմության միջազգային խորհրդին առընթեր Հայաստանի ազգային կոմիտեն է։ -0-
