Հայաստանը և Վրաստանը կհամագործակցեն վթարների և ԱՊ-ի հետևանքների վերացման գործում

Հայաստանի կառավարությունը հինգշաբթի տեղի ունեցած նիստում հավանություն է տվել վրացական կողմի հետ «Հայաստանի Հանրապետության կառավարության և Վրաստանի կառավարության միջև էլեկտրաէներգետիկական օբյեկտներում վթարների և այլ արտակարգ իրավիճակների դեպքում փոխօգնության մասին» համաձայնագրի ստորագրմանը:

Ինչպես հայտնեց Հայաստանի էներգետիկայի և բնական պաշարների նախարար Արմեն Մովսիսյանը, նման համաձայնագրի ստորագրման հնարավորությունը Հայաստանի և Վրաստանի միջև քննարկվում է 2006 թվականից տնտեսական համագործակցության հարցերի միջկառավարական համատեղ նիստերի ընթացքում։

Փաստաթղթի հիմնական նպատակը, ինչպես պարզաբանեց նախարարը, փոխադարձ օգնության բազայի ստեղծումն է էներգետիկայի օբյեկտտներում վթարների և այլ արտակարգ պատահարների դեպքում՝ նկատի առնելով Հայաստանի և Վրաստանի էներգահամակարգերի կայուն աշխատանքների ապահովման անհրաժեշտությունը։ Համաձայնագրի իրագործման արդյունքում նախատեսվում է հասնել երկու երկրների էներգահամակարգերի զուգահեռ աշխատանքի։

Համաձայնագրին համապատասխան՝ սահմանվում է օգնության ցուցաբերման կարգը վթարային-փրկարարական և վերականգնողական աշխատանքների անցկացման ժամանակ։ Փաստաթղթի համաձայն՝ համաձայնագրի կողմերի գործունեությունը, ներառյալ տեղեկատվության փոխանակումն ու տեխնիկական օգնության խմբերի ուղղումը վթարային վայրեր, կիրականացվի միջազգային  պայմանագրերին և երկու երկրների օրենսդրությանը համապատասխան։  

Համաձայնագրով ամրագրված է նաև, որ վթարների հետևանքների օպերատիվ վերացման համար կողմերը, մասնավորապես, կցուցաբերեն ֆինանսական, նյութատեխնիկական օգնություն, ինչպես նաև աջակցություն սարքավորումների և պահեստամասերի տրամադրման տեսքով։ -0-