ՀՀ ոստիկանության ակադեմիայի երկու ուսանողի մեղադրանք է ներկայացվել իրենց համակուրսեցուն ինքնասպանության հասցնելու համար, տեղեկացնում է գլխավոր դատախազության մամուլի ծառայությունը։
2010թ. հունվարի 19-ին, ժամը 09:30-ի սահմաններում, Վ.Գ.-ն ինքնասպանություն կատարելու նպատակով իրեն ցած է նետել ՀՀ ոստիկանության ակադեմիայի վարչական շենքի 5-րդ հարկի լսարաններից մեկի պատուհանից: «Արմենիա» բժշկական կենտրոնում ժամանակին ցուցաբերված բժշկական միջամտության արդյունքում տղայի կյանքը հաջողվել է փրկել:
«Նախաքննությամբ պարզվել է, որ ոստիկանության ակադեմիայի 1-ին կուրսի ուսանողներ 1-ին վաշտի 3-րդ դասակի հրամանատար Հ. Համբարձումյանը և կրտսեր սերժանտ Գ. Բարեյանը 2010թ. հունվարի 18-ից` մոտավորապես ժամը 23:30-ից սկսած, մինչև հունվարի 19-ի առավոտյան նույն կուրսի սովորող Վ.Գ.-ին ենթարկել են ֆիզիկական և հոգեբանական ճնշման, հարկադրել կատարել նրա պարտականությունների մեջ չմտնող, անպատվաբեր աշխատանքներ: Չդիմանալով նվաստացմանը` Վ. Գ.-ն փորձել է ինքնասպանություն կատարել»,- ասվում է հաղորդագրությունում։
Ձեռք բերված ապացույցների հիման վրա` Հ. Համբարձումյանին մեղադրանք է առաջադրվել ՀՀ քրեական օրենսգրքի 110-րդ հոդվածի 2-րդ մասով (մեղավորի նկատմամբ նյութական կամ այլ տեսակի կախվածության մեծ գտնվեղ անձին ինքնասպանության հասցնելը), իսկ Գ. Բարեյանին ` ՀՀ քրեական օրենսգրքի 110-րդ հոդվածի 1-ին մասով (ինքնասպանության հասցնելը կամ ինքնասպանության փորձ կատարելն անձի նկատմամբ սպառնալիքների, դաժան վերաբերմունքի կամ անձնական արժանապատվության պարբերական նվաստացման միջոցով՝ կատարած դիտավորությամբ կամ անզգուշությամբ):
Նախաքննությունն ավարտված է։ Հետաքննությունը վերահսկող դատախազը հաստատել է մեղադրական եզրակացությունը։
Քրեական գործն ուղարկվել է Երևանի Մալաթիա-Սեբաստիա վարչական շրջանների ընդհանուր իրավասության առաջին ատյանի դատարան` ըստ էության քննելու համար: -0
