Թուրքիան փաստորեն արգելափակել է իր խորհրդարանում հայ-թուրքական արձանագրությունների վավերացման գործընթացն, նախօրեին ասել է ՀՀ արտաքին գործերի նախարար Էդվարդ Նալբանդյանը Ստրասբուրգում Եվրոպայի Խորհրդի Նախարարների կոմիտեի 120-րդ նստաշրջանի ընթացքում։
ՀՀ նախագահ Սերժ Սարգսյանն ապրիլի 22-ի իր հրամանագրով կասեցրել է երկրի խորհրդարանում հայ-թուրքական արձանագրությունների վավերացման ընթացակարգը՝ հայտարարելով, որ Հայաստանը պահպանում է իր ստորագրությունները փաստաթղթերի տակ։ Հայ-թուրքական արձանագրությունները մնացել են Հայաստանի Ազգային ժողովի գարնանային նստաշրջանի օրակարգում։
«Արձանագրությունների ստորագրումից հետո Թուրքիան վերադարձավ նախապայմանների լեզվին, որն օգտագործում էր գործընթացի մեկնարկից առաջ եւ փաստորեն արգելափակեց թուրքական խորհրդարանում արձանագրությունների վավերացումը: Այդ իսկ պատճառով Հայաստանի նախագահը որոշեց կասեցնել վավերացման գործընթացը Հայաստանում, մինչև Անկարան նորից պատրաստ լինի շարունակել գործընթացը առանց նախապայմանների, և այդ քայլը դրական ընկալվեց միջազգային հանրության կողմից»,- «Նովոստի-Արմենիա» գործակալությանը Նալբանդյանի խոսքերը մեջբերեցին Հայաստանի ԱԳՆ մամուլի ծառայությունից:
Նա հիշեցրեց, որ բարելավման գործընթացը սկսվեց Հայաստանի նախագահի նախաձեռնությամբ։
«Չնայած բազմաթիվ դժվարություններին, մենք սկսեցինք գործընթացը Շվեյցարիայի միջնորդությամբ, վարեցինք բանակցությունները և ստորագրեցինք արձանագրությունները այն ընդհանուր փոխըմռնմամբ, որ կարգավորման գործընթացում չեն կարող լինել նախապայմաններ: Այս դիրքորոշումը կիսում են միջնորդ և աջակից երկրները և ամբողջ միջազգային հանրությունը»,- ասել է Նալբանդյանը: -0-
