Սարգսյանը ցավակցական հեռագիր է հղել Մեդվեդևին «Ռասպադսկայա» ածխահանքի ողբերգության կապակցությամբ

Նախագահ Սերժ Սարգսյանը ցավակցական հեռագիր է հղել ՌԴ Նախագահ Դմիտրի Մեդվեդևին` ՌԴ Կեմերովոյի մարզի «Ռասպադսկայա» ածխահանքում տեղի ունեցած ողբերգության առթիվ, որը մի քանի տասնյակ մարդկային զոհերի պատճառ է դարձել. տեղեկացնում է ՀՀ նախագահի մամուլի ծառայությունը:

«Ձեզ և ողջ ռուս ժողովրդին իմ խորին ցավակցությունն եմ հայտնում Կեմերովոյի մարզի «Ռասպադսկայա» ածխահանքում տեղի ունեցած ողբերգության առթիվ, որը տասնյակ մարդկային կյանքեր տարավ։ Այս վշտալի օրերին Ձեր հետ կիսում ենք կորստյան ցավն ու կսկիծը, և խնդրում ենք կարեկցանքի խոսքեր փոխանցել զոհվածների հարազատներին ու մտերիմներին»,- ասված է նախագահ Սարգսյանի հեռագրում:

Մայիսի 9-ի լույս գիշերը չորս ժամ տարբերությամբ երկու պայթյուն է տեղի ունեցել Ռուսաստանի խոշորագույն ածխահանքում, երկրորդ պայթյունն ավելի ուժեղ է եղել։ Ածխահանքում երկրորդ պայթյունի պահին փակված է մնացել մի քանի տասնյակ մարդ, այդ թվում՝ 19 փրկարար։ Զոհվել է 52 մարդ, այդ թվում՝ առաջին պայթյունից հետո օգնության մեկնած փրկարարները։ 38 մարդու ճակատագիր անհայտ է։ -0-