Հայ հեղափոխական Դաշնակցություն խորհրդարանական խմբակցությունը չի մասնակցի ԵԽԽՎ ղեկավար Մևլյութ Չավուշօղլուի հետ հայկական խորհրդարանի խմբակցությունների հանդիպմանն այն պատճառով, որ ԵԽԽՎ ղեկավարը հրաժարվել է այցելել Հայոց ցեղասպանության զոհերի հիշատակին նվիրված հուշարձանին Երևանի այցի շրջանակներում, ասվում է ՀՅԴ խմբակցության նամակում, որն ուղղված է ՀՀ ԱԺ խոսնակ Հովիկ Աբրահամյանին, հաղորդում է «ՌԻԱ Նովոստին»։
Չավուշօղլուի այցը Հայաստան ծրագրված է մայիսի 12-13-ը։
Նամակում նշվում է, որ ԵԽԽՎ բոլոր նախագահները, ովքեր այցելել են Երևան, երբեք իրենց նման անհարգալից վերաբերմունք թույլ չեն տվել, անկախ այն բանից, թե ճանաչել է իրենց երկիրը Հայոց ցեղասպանությունը, թե ոչ։
ԵԽԽՎ-ում Հայաստանի պատվիրակության դաշնակցական անդամ, ԱԺ արտաքին հարաբերությունների մշտական հանձնաժողովի նախագահ Արմեն Ռուստամյանը նույնպես հրաժարվել է մասնակցել Չավուշօղլուի և ԵԽԽՎ-ում Հայաստանի պատվիրակության հանդիպմանը։
Մյուս խորհրդարանական խմբակցության՝ «Ժառանգություն» կուսակցության անդամները երեքշաբթի երեկոյան կքննարկեն Չավուշօղլու հետ պատգամավորների հանդիպման հարցը։
«Տվյալ պահին մենք հակված ենք գնալ այդ հանդիպմանն ու մեր կարծիքը հայտնել հատկապես Չավուշօղլուի և նրա երկրի պաշտոնատար անձանց հայտարարությունների առթիվ։ Բայց եթե կուսակցության վարչությունը որոշի, որ հանդիպումը չպետք է կայանա, պատգամավորները չեն գնա»,- «ՌԻԱ Նովոստիին» ասաց «Ժառանգություն» խմբակցության անդամ Ստեփան Սաֆարյանը։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։--0--
