Մեծ Հաղթանակի հոբելյանը նշվել է Երևանի պետական համալսարանում
ԵՐԵՎԱՆ, 11 մայիսի. /Նովոստի-Արմենիա/. Մեծ Հաղթանակի 65-ամյակին նվիրված հանդիսավոր միջոցառում է կայացել երեքշաբթի Երևանի պետական համալսարանում։
«Այսօրվա միջոցառումը եզրափակում է դեռ մեկ ամիս առաջ՝ ապրիլի 15-ին ԵՊՀ ռուսական կենտրոնի նախաձեռնած միջոցառումների շարքը»,- ասաց կենտրոնի տնօրեն Արուսյակ Ներսիսյանը։
Միջոցառման ժամանակ ուսանողները պատերազմի թեմայով երաժշտական և գրական ստեղծագործություններ ներկայացրեցին։
Ըստ Ներսիսյանի՝ ԵՊՀ ռուս բանասիրության և ԵՊՀ ուսանողական-գիտական խորհրդի հետ համատեղ կազմակերպված ակցիայի շրջանակներում Հայաստանի մարզերի և մայրաքաղաքի շուրջ 14 դպրոցներում ամսվա ընթացքում միջոցառումներ են անցկացվել՝ ուսանողների անմիջական մասնակցությամբ։
Իր հերթին Հայաստանում Ռուսաստանի Արտակարգ և լիազոր դեսպան Վյաչեսլավ Կովալենկոն ուրախալի անվանեց այն փաստը, որ ԵՊՀ-ն՝ Հայաստանի առաջատար բարձրագույն ուսումնական հաստատությունը, հաղթանակի 65-ամյակին նվիրված միջոցառումներ է անցկացնում երիտասարդության նման մեծ ներգրավվածությամբ։
«Միջոցառումը, որն այսօր անցկացվում է համալսարանում շատ նշանակալի իրադարձություն է, քանի որ դրան մասնակացում է նոր սերունդը՝ երիտասարդությունը, որը՝ ի ուրախություն, անծանոթ է այդ պատերազմի սարսափներին և դրա հետևանքներին»,- ասաց նա։
Ըստ դեսպանի՝ շատ կարևոր է, որպեսզի նոր սերունդն առաջին աղբյուրներից իմանա Հայրենական Մեծ պատերազմի իրական պատճառները։
«Մենք պետք է շատ լավ իմանանք և գնահատենք այն սխրանքը, որը կատարել են մեր հայրերն ու պապերը։ Անհայտ է, թե ինչպես կդասավորվեր մեր կյանքը, եթե պատմությունն այլ սցենարով զարգանար, ոչ թե հաղթանակի սցենարով, այլ մեր երբեմնի ընդհանուր երկրի՝ ԽՍՀՄ-ի համար ողբերգական սցենարով»,- ասաց նա։ -0-
