Բելգիան աջակցում է Թուրքիայի հետ հարաբերությունների կարգավորմանն ուղղված ՀՀ նախագահ Սերժ Սարգսյանի նախաձեռնությանը, երեքշաբթի հայտարարել է Հայաստանում Բելգիայի արտակարգ և լիազոր դեսպան Ստեֆան Դե Լոկերը ՀՀ նախագահին իր հավատարմագրերը հանձնելիս:
Հայ-թուրքական հարաբերությունների կարգավորման գործընթացը սկսվել է ՀՀ նախագահ Սերժ Սարգսյանի նախաձեռնությամբ: Հայաստանի ու Թուրքիայի արտգործնախարարները 2009 թ.-ի հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից: Սակայն 2010 թ.-ի ապրիլի 22-ին Սարգսյանը հրամանագիր ստորագրեց հայ-թուրքական արձանագրությունների վավերացման գործընթացը կասեցնելու մասին՝ հայտարարելով, որ Թուրքիան պատրաստ չէ շարունակել սկսված գործընթացը:
«Բելգիայի կառավարությունը ողջունում է ՀՀ նախագահի` Հայաստանի և Թուրքիայի միջև հարաբերությունների կարգավորմանն ուղղված ջանքերը և աջակցություն է հայտնում այդ բարդ ու դժվարին գործընթացին», - մեջբերեցին Լոկերի խոսքերը ՀՀ նախագահի մամուլի ծառայությունից:
Զրուցակիցները մտքեր են փոխանակել նաև տարածաշրջանային խնդիրների շուրջ: Հանրապետության նախագահը դիվանագետի խնդրանքով ներկայացրել է նաև Լեռնային Ղարաբաղի հիմնախնդրի խաղաղ կարգավորման բանակցային գործընթացի ներկա փուլի վերաբերյալ Երևանի մոտեցումները:
Նախագահ Սարգսյանը շնորհավորել է Դե Լոկերին դեսպանին պաշտոնը ստանձնելու կապակցությամբ և հույս հայտնել, որ նա զգալի ներդրում կկատարի Հայաստան-Բելգիա հարաբերությունների զարգացման գործում:
ՀՀ նախագահը նշել է, որ Հայաստանը խորապես շահագրգիռ է` սերտացնելու հայ-բելգիական համագործակցությունն ինչպես երկկողմ, այնպես էլ բազմակողմ ձևաչափերով: Կողմերը հատկապես կարևորել են Եվրամիության Արևելյան գործընկերության ծրագրի շրջանակում փոխգործակցությունը:
Սարգսյանն ու Ստեֆան Դե Լոկերն անդրադարձել են նաև ՀՀ նախագահի` Բրյուսել կատարելիք առաջիկա այցին` վստահություն հայտնելով, որ այն հայ-բելգիական հարաբերությունների հետագա զարգացման համար լրացուցիչ խթան կդառնա:-0-
