Հայաստանը պատրաստ է շարունակել հայ-թուքական հարաբերությունների կարգավորման գործընթացը, սակայն դրան պետք է պատրաստ լինի նաև Թուրքիան, կարծում է ՀՀ ԱԺ տնտեսական հարցերի մշտական հանձնաժողովի փոխնախագահ, «Բարգավաճ Հայաստան» խմբակցության պատգամավոր Վարդան Բոստանջյանը:
ՀՀ նախագահ Սերժ Սարգսյանն ապրիլի 22-ի իր հրամանագրով կասեցրել է երկրի խորհրդարանում հայ-թուրքական արձանագրությունների վավերացման ընթացակարգը՝ հայտարարելով, որ Հայաստանը պահպանում է իր ստորագրությունները փաստաթղթերի տակ։ Հայ-թուրքական արձանագրությունները մնացել են Հայաստանի Ազգային ժողովի գարնանային նստաշրջանի օրակարգում։
«Հայաստանը դուրս չէր եկել հարաբերությունների կարգավորման գործընթացից: Ես կարծում եմ, որ գործընթացը պետք է շարունակվի առանց նախապայմանների: Մենք միջազգային հասարակությանը բազմաթիվ անգամ հայտարարել ենք, որ Հայաստանը պատրաստ է առաջ ընթանալու, բայց դրան պետք է պատրաստ լինի նաև մյուս կողմը»,- ուրբաթ մամուլի ասուլիսի ժամանակ ասաց Բոստանջյանը:
Ըստ նրա, Հայաստանն ու Թուրքիան հարևաններ են և պետք է ապրեն ու աշխատեն բարիդրացիական պայմաններում: Ինչպես հիշեցրեց Բոստանջյանը, հենց այդ պատճառով ՀՀ նախագահը հանդես եկավ Թուրքիայի հետ հարաբերությունների կարգավորման լուրջ և արմատական նախաձեռնությամբ:
Սակայն, երբ Թուրքիան սկսեց կարգավորման գործընթացը կապել մի շարք այլ գործընթացների հետ և ցանկացավ ձևափոխել այն, ՀՀ նախագահը, ինչպես նշեց պատգամավորը, որոշեց սառեցնել արձանագրությունների վավերացման գործընթացը մինչև այն ժամանակ, քանի դեռ Թուրքիան չի գիտակցի առանց նախապայմանների հարաբերությունների կարգավորման անհրաժեշտությունը:
Խորհրդարանականն ընդգծեց, որ Հայաստանի համար կարևոր է Հայոց ցեղասպանության պատմական հիշողության պահպանումն ու դրա միջազգային ճանաչման գործընթացը:Բոստանջյանը նշեց, որ Հայաստանը չի հարկադրում պետություններին ճանաչել Հայոց ցեղասպանության փաստը, սակայն ավելացրեց, որ որքան շատ երկրներ ճանաչեն Հայոց ցեղասպանության փաստը, այնքան կնվազի ապագայում նման հանցագործության հնարավորությունը:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
