Իսլանդական հրաբխի ժայթքումից հայկական ավիափոխադրողը լուրջ վնասներ չի կրել

Հայաստանի ազգային ավիափոխադրող «Արմավիա» ընկերությունը լուրջ վնասներ չի կրել իսլանդական Էյաֆյատլայոկուդլի հրաբխից առաջացած մոխրի պատճառով մի շարք չվերթեր հետաձգելու պատճառով, լրագրողներին ասաց «Արմավիա» ընկերության նախագահ Միխայիլ Բաղդասարովը:

Հրաբխային մոխրի մասնիկները վտանգավոր են ավիացիոն շարժիչների տուրբինների համար և կարող են խնդիրներ առաջացնել՝ նստելով ինքնաթիռի թևերին: Եվրոպական թռիչքների անվտանգության ծառայությունները որոշում էին կայացրել շատ տարածաշրջաններում որոշ ժամանակով փակել օդային տարածությունը՝ ներառյալ Մեծ Բրիտանիան և Իռլանդիան:

«Հրաբխի հետ կապված մենք հինգ չվերթ ենք հետաձգել՝ երկու չվերթ դեպի Փարիզ, երկու չվերթ՝ դեպի Ամստերդամ, և մեկ չվերթ՝ դեպի Ցյուրիխ: Եվրոպայի խոշոր ընկերությունների համեմատ մեր վնասները զգալիորեն քիչ են»,- ասաց ընկերության նախագահը:

Ըստ Բաղդասարովի, ներկայում վնասները հաշվվում են:

«Արմավիա» ավիաընկերությունը հայկական ավիացիոն շուկայի առաջատարն է և Հայաստանի ազգային ավիափոխադրողը։ Ընկերությունը ստեղծվել է 1996թ.-ին հիմնադիրներ՝ «Ավիաֆին» ԲԲԸ և «Միկա Արմենիա Թրեյդինգ» ԲԲԸ կողմից։ 2005 թ. հունիսից ավիաընկերության 100 տոկոս բաժնետերն է «MIKA Armenia Trading» ընկերության նախագահ Միխայիլ Բաղդասարովը։

Այսօր «Արմավիա» ավիապարկն ութ ինքնաթիռ ունի (երեք Ա320, երեք А319, CRJ-200, ՅԱԿ-42-VIP):-0—