Երևանում չորեքշաբթի բացվել է Հայաստանի և Վրաստանի հրատարակչական գործի մասնագետների համար նախատեսված սեմինարը:
«Հրատարակիչները կատալիզատորի դեր են խաղացել գրականության տարածման գործում», - սեմինարի բացման ժամանակ հայտարարել է Հայաստանում Գերմանիայի արտակարգ և լիազոր դեսպան Հանս Յոհան Շմիդտը: Նա ավելացրել է, որ այժմ Գերմանիայում ամեն տարի լույս է տեսնում 970 միլիոն դոլարի գիրք, իսկ հրատարակությունների ընդհանուր շրջանառությունը կազմում է 9.3 միլիարդ դոլար:
«Մշակույթ և զարգացում» նախաձեռնության համակարգիչ Կսենյա Ռիկլինան իր հերթին «Նովոստի-Արմենիա» գործակալությանը տեղեկացրել է, որ Երևանի սեմինարը ԱՊՀ երկրներում անցկացվող մասշտաբային նախագծի մի մասն է, որը կոչված է բարձրացնել հրատակարակչական գործի մասնագետների որակավորումը:
Նրա խոսքերով, չնայած Հայաստանում, տարածաշրջանի այլ երկրների համեմատ, շատ բարձր է հրատարակիչների կրթական մակարդակը, սակայն Գերմանիայում հրատարակչական գործի կառուցվածքն ու կազմակերպումը արտակարգ լավ է մտածված, և Հայաստանը շատ բան կարող է քաղել այդ փորձից:
«Մենք այս գործն ինքնուրույն ենք սովորել և, ծանոթանալով աշխարհում հրատարակչական գործին, հասկանում ենք, որ կան գիտելիքներ, որոնց մենք չենք տիրապետում: Եվ նման միջոցառումները կոչված են վերացնել այդ գիտելիքների պակասը», - նշել է «Անտարես» հրատարակչության ղեկավար Արմեն Մարտիրոսյանը:
Մինչև մայիսի 8-ը ընթացող սեմինարը կազմակերպվել է «Մշակույթ և զարգացում» նախաձեռնության շրջանակներում Գյոթեի անվան գերմանական մշակութային կենտրոնի, Հրատարակիչների հայկական ազգային ասոցիացիայի, «Անտարես» և «Զանգակ 97» հրատարակչությունների կողմից: Միջոցառմանը մասնակցում է հայկական 20 և վրացական 5 հրատարակչությունների ներկայացուցիչներ:-0-
