ՀՀ պաշտպանության նախարարությունը կոչ է անում հայկական ԶԼՄ-ներին չտարածել չստուգված լուրեր

ԵՐԵՎԱՆ, 4 մայիսի. /Նովոստի-Արմենիա/. ՀՀ պաշտպանության նախարարությունը խորհուրդ է տալիս հայկական որոշ ԶԼՄ-ների՝ ճշտել իրենց հասած տեղեկությունների հավաստիությունը և չտարածել բացահայտ սուտ և չստուգված լուրեր, ասվում է երեքշաբթի ՀՀ պաշտպանության նախարարության մամուլի ծառայության տարածած տեղեկատվության մեջ:

Տեղեկատվությունը տարածվել էր ՀՀ պաշտպանության նախարարության և զորամասերի մասին հայկական ԶԼՄ-ներում նախօրեին տեղ գտած մի շարք հրապարակումների կապակցությամբ:

«Հղումներ անելով ինչ-որ սեփական աղբյուրների և տեղեկությունների` հայաստանյան որոշ լրատվամիջոցներ շարունակում են տարածել կեղծ, չճտված տեղեկություններ: Խորհուրդ ենք տալիս այդ լրատվամիջոցներին ճշտել իրենց հասած տեղեկությունների հավաստիությունը և չտարածել բացահայտ սուտ և չստուգված լուրեր», - ասվում է տեղեկատվության մեջ:

Այս կապակցությամբ ՀՀ պաշտպանության նախարարությունը հերքել է տեղեկատվությունն այն մասին, թե ՀՀ ՊՆ տեղեկատվության և հասարակայնության հետ կապերի վարչության պետ Վարդան Ավետիսյանը նշանակվելու է ՀՀ գյուղատնտեսության փոխնախարարի պաշտոնում:

«Հայկական ժամանակ» թերթի մայիսի 4-ի համարում տպագրված հոդվածի համաձայն՝ ՀՀ ՊՆ տեղեկատվության և հասարակայնության հետ կապերի վարչության պետ, գեներալ-մայոր Վարդան Ավետիսյանը նշանակվելու է ՀՀ գյուղատնտեսության փոխնախարարի պաշտոնում Վարդան Կարապետյանի փոխարեն, ով առաջիկայում կազատվի պաշտոնից Նոր-Նորք համայնքում զինված միջադեպին մասնակցելու պատճառով:

ՀՀ պաշտպանությունը տեղեկացնում է նաև, որ իրականությանը չի համապատասխանում «Հրապարակ» օրաթերթի մայիսի 4-ի համարում տպագրված տեղեկատվությունը, թե իբրև ԶՈւ զորամասերից մեկում պայմանագրային զինծառայողներին չի հատկացվում բավարար քանակի սննդամթերք: -0-