Հայաստանում ռուսական գազի մատակարարումը դեռ չի վերսկսվել, «Նովոստի-Արմենիա» գործակալությանն ասաց «ՀայՌուսգազարդ» ՓԲԸ մամուլի քարտուղար Շուշան Սարդարյանը:
Հայաստանում ռուսական գազի մատակարարումը ժամանակավորապես դադարեցվել էր ապրիլի 29-ին, Հյուսիսային Կովկասում մայրուղային գազատարի վնասվելու պատճառով, ինչը Հյուսիսային Կովկասում բարձլեռնային շրջաններից մեկում տեղացող սողանքի հետևանք էր:
«Վերականգնողական աշխատանքները շարունակվում են»,- ասաց Սարդարյանը:
Վրացական գազատրանսպորտային ընկերության տվյալների համաձայն, վնասված գազատարի վերականգնողական աշխատանքներ են տարվում, դրանց իրականացման համար, նախնական տվյալներով, երեք օր էր պահանջվում:
«Նովոստի-Արմենիա» գործակալությանը Սարդարյանը նաև հայտնեց, որ Հայաստանի տարածաշրջանում գազամատակարարման ոչ մի սահմանափակում գոյություն չունի:
«Չդադարող գազամատակարարումը շարունակվում է Աբովյանի գազի ստորգետնյա պահեստարան-կայանի պաշարների շնորհիվ»,- ասաց նա:
Աբովյանի գազի պահեստարան-կայանը Հայաստանի գազատրանսպորտային համակարգի գլխավոր տարրերից է, որն ապահովում է հանրապետության էներգետիկ անվտանգությունը:
Աբովյանի գազի ստորգետնյա պահեստարան-կայանը գազի արդյունաբերական օգտագործման մեջ կարգավորում է սեզոնային և պիկային անհամաչափությունները:
2010 թ.-ի մարտի 1-ի դրությամբ Աբովյանի գազի ստորգետնյա պահեստարան-կայանում պաշարված բնական գազի փաստացի ծավալը կազմել է 118 միլիոն խորանարդ մետր: Գազի մատակարարման օբյեկտների խափանման դեպքում այս կայանը, կախված տարվա ժամանակից, ի վիճակ է գազ մատակարարել 1-1,5 ամսվա ընթացքում: «ՀայՌուսգազարդ» ՓԲԸ-ն Հայաստանի ներքին շուկայում ռուսական բնական գազի մատակարարման և տեղաբաշխման մենաշնորհային իրավունք ունի։ Գազը մուտք է գործում Հայաստան Վրաստանի տարածքով:
Ընկերությունը ստեղծվել է 1997 թ.-ին, «Գազպրոմ» ԲԲԸ-ի մասնաբաժինն ընկերության կանոնադրական կապիտալում կազմում է 80 տոկոս, Հայաստանի կառավարության բաժինը՝ 20 տոկոս: -0-
