Հայաստանում մամուլի իրավունքների պաշտպանության իրավիճակը բարելավվել է. փորձագետ

Հայաստանում մամուլի իրավունքների պաշտպանության իրավիճակն, ընդհանուր առմամբ, զգալի կերպով բարելավվել և երկու կետով է բարձրացել, ասաց Խոսքի ազատության պաշտպանության հայկական կոմիտեի նախագահ Աշոտ Մելիքյանը՝ հիմնվելով «Freedom House» միջազգային կազմակերպության տվյալներին։

«Կարելի է ուրախանալ, որ իրավիճակը չի վատացել, բայց մեծ հաշվով մենք պետք է ուշադրություն դարձնենք, որ նույն «Freedom House»-ի դասակարգմամբ, Հայաստանի ԶԼՄ-ները դեռ մտնում են ոչ ազատ մամուլի կատեգորիայի մեջ»,- երկուշաբթի մամուլի ասուլիսի ժամանակ ասաց Մելիքյանը։

Ըստ Հայաստանի խոսքի ազատության պաշտպանության կոմիտեի, եթե 2009թ.-ի առաջին եռամսյակում լրագրողների հանդեպ ֆիզիկական բռնության 3 դեպք  է գրանցվել, ապա ընթացիկ տարվա առաջին եռամսյակում 5 նման դեպք է գրանցվել։ Սակայն, ըստ Մելիքյանի՝ եթե համեմատենք վերջին տվյալները 2008թ.-ի իրավիճակի հետ, ապա կարելի է ասել, որ մամուլի հետ իրավիճակն իրոք բարելավվել է։

Այս կապակցությամբ Կոմիտեի նախագահը նշեց, որ եթե հայկական իշխանություններն իրոք ցանկանում են Հայաստանում ԶԼՄ-ների ազատություն ամրապնդել, ապա պետք է երկրում անցկացնել ինչպես իրավական բարեփոխումներ, այնպես էլ մամուլին և, առաջին հերթին, հեռուստատեսային ԶԼՄ-ներին խոսքի ազատություն տալ։

1993թ.-ին ՅՈՒՆԵՍԿՕ-ի գլխավոր խորհրդաժողովի 26-րդ նստաշրջանի հանձնարարականով,  ՄԱԿ-ի Գլխավոր վեհաժողովը որոշել է մայիսի 3-ը Մամուլի ազատության համաշխարհային օր հռչակել։

Ամեն տարի այդ օրն ամբողջ աշխարհում միջոցառումներ են անցկացվում ի նշան նվիրվածության մամուլի ազատության հիմնարար սկզբունքների, ԶԼՄ-ներին  ոտնձգություններից  պաշտպանության, ինչպես նաև զոհված լրագրողների հիշատակը հարգելու նպատակով։ -0-