ՌԴ ԱԳՆ-ն պաշտոնական առաջարկություններ չի ստացել՝ Թուրքիային ԵԱՀԿ Մինսկի խմբի կազմում ընդգրկելու վերաբերյալ

 ՌԴ ԱԳՆ Ադրբեջանի կողմից պաշտոնական առաջարկություններ չի ստացել Թուրքիային Լեռնային Ղարաբաղի կարգավորման ԵԱՀԿ Մինսկի խմբի համանախագահ երկրների կազմում ընդգրկելու վերաբերյալ, ասել է ՌԴ ԱԳՆ պաշտոնական ներկայացուցիչ Անդրեյ Նեստերենկոն:

«Ռուսաստանը՝ որպես Մինսկի խմբի համանախագահ երկիր, նման առաջարկ, եթե այն նույնիսկ եղել է, պաշտոնապես չի ստացել: Ցանկացած դեպքում, այդ զրույցը գործնական հարթություն տեղափոխելու նպատակով, առնվազն անհրաժեշտ է հակամարտության բոլոր կողմերի համաձայնությունը: Նկատի առնելով այն, որ հայ-թուրքական հարաբերությունների արձանագրությունների վավերացման գործընթացը կասեցված է, հազիվ թե կարելի լինի հույս դնել նման համաձայնության վրա»,- Մոսկվայում տեղի ունեցած ճեպազրույցի ընթացքում ասել է դիվանագետը, հաղորդում է ՌԻԱ Նովոստին: -0-