ԵՐԵՎԱՆ, 28 ապրիլի. /Նովոստի-Արմենիա/. Եվրոպայի Հայկական Միությունների Ֆորումը նամակ է հղել ԱՄՆ նախագահ Բարաք Օբամային, որում խորը հիասթափություն է արտահայտվում ապրիլի 24-ին հայ ժողովրդին ուղղված ուղերձի վերաբերյալ, որտեղ ԱՄՆ նախագահը չէր օգտագործել «ցեղասպանություն» բառը:
ԱՄՆ նախագահ Բարաք Օբաման Օսմանյան կայսրությունում Հայոց ցեղասպանության զոհերի հիշատակին նվիրված հայտարարության մեջ կրկնել էր նախորդ տարվա տեքստին մոտ իր խոսքերը: Ոչ մի անգամ չհնչեցնելով «ցեղասպանություն» բառը՝ նա կրկին կոչ էր արել Թուրքիային և Հայաստանին շարունակել հարաբերությունների կարգավորմանն ուղղված ջանքերը և նշել, որ այդ ջանքերի շնորհիվ երկու երկրները միայն ավելի ուժեղ կլինեն:
«Մենք կարծում էինք, որ ձեզ՝ որպես անկախ, ազատ, ժողովրդավարական ու հզոր երկրի նախագահի, պատիվ կբերեր հանուն արդարության ասված ձեր անկեղծ խոսքերը և կիրառեիք Ձեր կողմից արդեն օգտագործված և միջազգային կարևորություն ունեցող «ցեղասպանություն» եզրույթը»,- ասվում է Ֆորումի նախագահ Աշոտ Գրիգորյանի՝ Օբամային ուղղված ուղերձում:
«Մեծարգո նախագահ, դուք այն չարեցիք: Աստված Ձեզ հետ: Մենք այլևս Ձեզ այսդ հարցով չենք դիմելու: Ցավում ենք, բայց մեր այս խորը հիասթափությունը հնարավոր է, որ ամերիկահայերից և աշխարհի ողջ հայերից անցնի նաև ամերիկացի ընտրողներին»,- նշված է ուղերձում:
Նամակում նշվում է , որ «այսպիսի կարևոր հարցում խոստումը չկատարող նախագահը ի վիճակի է նաև այլ կենսական նշանակություն ունեցող հարցերում սխալվել»:
ԵՀՄՖ-ն խորին շնորհակալություն է հայտնել այն ամերիկացիներին, ովքեր մշտապես սատարում են իր բարեկամ հայ ժողովրդին ու հատկապես կիսում նրա անդարմանելի ցավը՝ 1915թ.-ին տեղի ունեցած Հայոց ցեղասպանության շուրջ:
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 50 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։
ԱՄՆ Կոնգրեսի արտաքին հարաբերությունների հանձնաժողովը մարտի 4-ին ընդունել է Հայոց ցեղասպանությունը ճանաչող թիվ 252 բանաձևը, որը կոչ է անում ԱՄՆ նախագահին՝ջանքեր գործադրել մարդու իրավունքներին և ազատություններին, էթնիկ զտումների և Հայոց ցեղասպանությանը վերաբերող հարցերին արժանի լուծում տալու համար: Թուրքիան ավանդաբար հերքում է Առաջին համաշխարհային պատերազմի տարիներին Օսմանյան կայսրությունում շուրջ մեկուկես միլիոն հայերի ոչնչացումը և շատ ցավոտ է արձագանքում Արևմուտքի քննադատությանն այս հարցում:-0-
