Քնեսեթը կվերանայի օրակարգում Հայոց ցեղասպանության հարցի ներառումը

Իսրայելի խորհրդարանը՝ Քնեսեթը, չորեքշաբթի կվերանայի օրակարգում Հայոց ցեղասպանության հարցի ներառումը, մամուլի ասուլիսի ժամանակ ասաց հայ-իսրայելական հարաբերությունների փորձագետ Արտակ Գրիգորյանը:

«Այսօր Քնեսեթում նախատեսված է օրակարգում Հայոց ցեղասպանության ճանաչման հարցի ներառման հնարավորության քննարկումը: Բնական է, որ սա Քնեսեթի կողմից այդ խնդրի վերանայման առաջին դեպքը չէ: Այն վերանայվել է և 2007, 2008, և 2009 թվականներին: Պետք է ասեմ, որ այդ հարցը մեծ հաջողություն չի ունեցել, քանի որ ելնելով մի շարք աշխարհաքաղաքական գործոններից, Իսրայելը հակված չէ Հայոց ցեղասպանության ճանաչմանը»,- ասաց Գրիգորյանը՝ ավելացնելով, որ  հոռետեսորեն է տրամադրված նաև այս անգամ:

Ըստ փորձագետի, Քնեսեթում ղեկավարվում են ոչ թե անձնական համակրանքով, այլ  Իսրայելի պետական շահերի պաշտպանությամբ՝ չնայած հայամետ լոբբիի, մասնավորապես՝ հայամետ գործիչ Հայիմ Օրոնի առկայությանը:

Գրիգորյանն ավելացրեց, որ հարցի վերանայման հետ մեկտեղ Քնեսեթում կմասնակցեն Երուսաղեմի Սուրբ Հակոբյաց միաբանության ներկայացուցիչները և Իսրայելի հայ համայնքը:

Աշխարհասփյուռ հայերը 2010թ.-ի ապրիլի 24-ին նշեցին Օսմանյան կայսրությունում տեղի ունեցած Հայոց ցեղասպանության 95-ամյա տարելիցը:

Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։

Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-