Ծիծեռնակաբերդի հուշահամալիրի Անմար կրակի շուրջ դրված ծաղիկները նորից «կյանք» կառնեն
ԵՐԵՎԱՆ, 27 ապրիլի. /Նովոստի-Արմենիա/. Ծիծեռնակաբերդի հուշահամալիրի Անմար կրակի շուրջ դրված ծաղիկները նորից «կյանք» կառնեն, հաղորդում է Հայաստանում Վայրի բնության և մշակութային արժեքների պահպանության հիմնադրամի (FPWC) մամուլի ծառայությունը:
FPWC-ի նախաձեռնությամբ և VivaCell-MTS բջջային օպերատորի աջակցությամբ Անմար կրակի շուրջ դրված ծաղիկներից կպատրաստվեն Հայոց ցեղասպանության թանգարան-ինստիտուտի համար նախատեսված շնորհակալագրեր և հուշաթերթիկներ, ինչպես նաև Ծիշեռնակաբերդի հուշահամալիրի այգու համար պարարտանյութ:
ՎիվաՍել-ՄՏՍ-ի կամավորների, Արևորդի էկո-ակումբների սաների, հիմնադրամի աշխատակիցների, մի շարք կազմակերպությունների և անհատների միջոցով ցողունները ծաղկի գլխիկներից խնամքով առանձնացվել են` հետագայում Ծիշեռնակաբերդի հուշահամալիրի այգու համար պարարտանյութ դառնալու նպատակով, իսկ ծաղկի թերթիկները հատուկ պայմաններում կչորացվեն:
Նախաձեռնությունը կավարտի FPWC-ի և VivaCell-MTS-ի միջոցառումների շարքը, որը նվիրված էր Հայոց ցեղասպանության 95-րդ տարելիցին: Մասնավորապես, ապրիլի 22-ին Ծիծեռնակաբերդում հիմնադրվել է «Հիշողության պուրակը», որտեղ Արևմտյան Հայաստանից բերված 95 ծառ է տնկվել:
Համայն հայությունը շաբաթ օրը՝ ապրիլի 24-ին նշել է Օսմանյան կայսրությունում Հայոց ցեղասպանության 95-րդ տարելիցը: 1915 թ.-ի Հայոց ցեղասպանությունը ХХ դարի առաջին ցեղասպանությունն է:
Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ նահանգների մեծամասնությունը, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
