Համագործակցության բոլոր երկրներում տնտեսական աճ է նկատվում, ինչը թույլ է տալիս փաստել, որ ԱՊՀ տնտեսությունները վերականգնման փուլում են գտնվում, երեքշաբթի լրագրողներին ասաց ՀՀ վարչապետ Տիգրան Սարգսյանը։
Մասնավորապես, ըստ նրա, 2010 թվականի առաջին եռամսյակում Հայաստանում արձանագրվել է 5,5 տոկոսով ՀՆԱ աճ։ Արդյունաբերությունը, կառավարության ղեկավարի համաձայն, աճում է գերազանցող տեմպերով, թեև շինարարության ոլորտում աճ չի նկատվում։
Սարգսյանը հայտնեց նաև արտաքին ապրանքաշրջանառության ավելացման մասին՝ արտահանումը 2010 թվականի առաջին եռամսյակում աճել է ավելի քան 50 տոկոսով, իսկ ներկրումը՝ 22 տոկոսով։
«Ես ծանոթացա նաև Ռուսաստանի և Ուկրաինայի թվերին, և դրանք համադրելի են։ ՀՆԱ աճն այդ երկրներում գրանցվել է առաջին եռամսյակում 5 տոկոսի սահմաններում»,- նշեց կառավարության ղեկավարը։
Նկատի առնելով դա, ըստ նրա, կարելի է փաստել, որ ԱՊՀ երկրների տնտեսությունները վերականգնման փուլում են։
«Եթե առկա միտումները պահպանվեն նաև 2010 թվականի երկրորդ կիսամյակում, ապա ավելի համոզված կլինենք, որ ռեցեսիան հաղթահարված է»,- ընդգծեց Սարգսյանը։
Նա ավելացրեց, որ համաշխարհային մամուլի և հիմնական ֆինանսական կենտրոնների վերլուծությունը ցույց է տալիս, որ առաջատար փորձագետների մեծամասնությունը գնահատում է համաշխարհային տնտեսության վերականգնումը որպես ակնհայտ փաստ։
Վարչապետի խոսքերով՝ այդ փաստը նույնիսկ ստիպեց Արժույթի միջազգային հիմնադրամին վերանայել իր կանխատեսումները դեպի աճ։
«Հնարավոր է, որ աճի տեմպերն այնպիսին չլինեն, ինչպես նախաճգնաժամային ժամանակահատվածում, բայց աճ արդեն նկատվում է, և դա լավատեսություն է ներշնչում»,- ասաց Սարգսյանը։ -0-
