Հայտնի հայ նկարիչների՝ Հարություն և Արմինե Կալենց ամուսնական զույգի թանգարանը կբացվի երեքշաբթի Երևանում, երկուշաբթի հայտնեց նրանց որդին՝ Հայաստանի գեղեցիկ արվեստների ազգային ակադեմիայի պրոֆեսոր, «Կալենց» մշակութային հիմնադրամի նախագահ Սարո Կալենցը։
Թանգարանի բացումը նվիրված է Արմինեի 90-ամյա և Հարություն Կալենցի 100-ամյա հոբելյանին։
Հարություն Կալենցը ծնվել է 1910 թ. Օսմանյան կայսրության Սեբաստիա նահանգի Կյուրուն քաղաքում։ Ապրել է Հալեպում, Տրիպոլում, Բեյրութում։ 1946 թվականին տեղափոխվել է Հայաստան։ Ցմահ արժանացել է Պետական մրցանակի։ Արմինե Կալենցը ծնվել է 1920 թվականին 1915 թվականին ցեղասպանությունից փրկված և Սիրիայում հաստատված ընտանիքում։ Գեղարվեստական կրթություն է ստացել, Բեյրութում աշակերտել է Հարություն Կալենցին։ Նկարչուհու առաջին ցուցահանդեսը բացվել է Հալեպում, 1939 թվականին։
«Թանգարանի բացման գաղափարն առաջ է եկել նկարչի մահվան հենց հաջորդ օրը՝ 1967 թվականին, երբ մեզ այցելեցին Երևանի քաղխորհրդի նախագահը, մշակույթի հարցերի վարչության պետն ու պետական այլ գործիչներ։ Նրանք խոստացան, որ անպայման կկառուցվի Կալենցի թանգարանը, որովհետև այն ժամանակ նա, հիրավի, ժողովրդական նկարիչ էր, և նրա արվեստն անհնար էր չնկատել։ Սակայն, ինչպես տեսնում եք, 42 տարվա ընթացքում ոչինչ տեղի չունեցավ, և մեր ընտանիքն ինքը որոշեց թանգարան կառուցել»,- երկուշաբթի «Նովոստի» միջազգային մամուլի կենտրոնում լրագրողներին հայտնեց Կալենցը։
Թանգարանը կբացվի «Կալենց» մշակութային հիմնադրամի ֆինանսական աջակցությամբ և Հայաստանի մշակույթի նախարարության օժանդակությամբ։
«Կալենց» մշակութային հիմնադրամի և թանգարանի տնօրեն Լարիսա Կատասանովան նշեց, որ թանգարանի հավաքածուում կընդգրկվի ավելի քան 400 գեղանկարչական և գրաֆիկական աշխատանքներ, ինչպես նաև փաստաթղթերի արխիվ՝ նկարիչների կյանքի և ստեղծագործության մասին։ Թանգարանը կառուցվել է Կալենց ընտանիքի տուն-արվեստանոցի բազայի վրա, որտեղ երկրորդ հարկն ամբողջովին նվիրված է Հարություն Կալենցի, իսկ երրորդը՝ նրա կնոջ՝ Արմինե Կալենցի ստեղծագործություններին։
Թանգարանի բացման նպատակը ոչ միայն Կալենց ամուսինների ստեղծագործության մասին պատմելն է, այլ նաև ժամանակակից արվեստի ստեղծագործությունների ներկայացումը։ -0-
