Թուրքիայի արտգործնախարար Ահմեդ Դավութօղլուն անընդունելի է համարել Օսմանյան Թուրքիայում Հայոց ցեղասպանության զոհերի հիշատակի օրվան նվիրված՝ ԱՄՆ նախագահ Բարաք Օբամայի հայտարարությունը:
«1915 թ.-ի միջադեպի կապակցությամբ ԱՄՆ նախագահ Բարաք Օբամայի ուղերձը սխալ և անընդունելի է», - ասվում է Դավութօղլուի հայտարարության մեջ, որը երկուշաբթի «Նովոստի-Արմենիա» գործակալությանն է տրամադրել ՀՀ ԱԳՆ մամուլի ծառայությունը:
Այս տարի ապրիլի 24-ին ԱՄՆ նախագահ Բարաք Օբաման Օսմանյան կայսրությունում Հայոց ցեղասպանության զոհերի հիշատակին նվիրված հայտարարության մեջ կրկնել է նախորդ տարվա տեքստին մոտ իր խոսքերը: Ոչ մի անգամ չհնչեցնելով «ցեղասպանություն» բառը՝ նա կրկին կոչ է արել Թուրքիային և Հայաստանին շարունակել հարաբերությունների կարգավորմանն ուղղված ջանքերը և նշել է, որ այդ ջանքերի շնորհիվ երկու երկրները միայն ավելի ուժեղ կլինեն:Հայոց ցեղասպանության փաստը ճանաչելու խոստումը Օբաման տվել է նախընտրական արշավի ժամանակ, սակայն դեռ այն չի կատարել:
Դավութօղլուն դեմ է հանդես եկել քաղաքական դրդապատճառներից ելնելով պատմության գնահատականին՝ նշելով, որ պատմությունը կարող է ուսումնասիրվել միայն պատմաբանների կողմից, և նման պատմական միջդեպերը պետք է ուսումնասիրվեն միայն այն երկրների կողմից, որոնք անմիջական կապ ունեն այդ հարցի հետ:
Թուրքիայի արտգործնախարարն ասել է, որ ոչ խորհրդարանները, ոչ գործադիր մարմինները չեն կարող նման պատմական դատողություններ անել, դա անընդունելի է: Նա ավելացրել է, որ պատմության միակողմանի ուսումնասիրման փորձերը կարող են անարդարության պատճառ դառնալ:
Դավութօղլուն իր հայտարարության մեջ նշել է, որ Թուրքիան «խորապես վշտացած է նախագահի ուղերձի կապակցությամբ, որն արտացոլում է սխալ և միակողմանի քաղաքական ըմբռնումներ»:
XIX դարի վերջում- XX դարի սկզբում հայերը ենթարկվում էին պարբերական հալածանքների և հետապնդումների Օսմանյան Թուրքիայի կողմից: Մասնավորապես, 1915 թ.-ին ոչնչացվել է հայ ժողովրդի ավելի քան 1.5 միլիոն ներկայացուցիչ:
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 50 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։
Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։-0-
