Մի շարք թուրքական ԶԼՄ-ներ իրենց հրապարակումներում հայտարարում են, որ հենց Թուրքիան է ձախողել հայ-թուրքական արձանագրությունները՝ Ղարաբաղի առնչությամբ նախապայմաններ առաջադրելով, «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ հայտարարեց թուրքագետ Արտակ Շաքարյանը:
«Թուրքական Milliyet թերթը գրում է այն մասին, որ Թուրքիայի արտաքին քաղաքականությունը փակուղի է մտել: Ըստ թերթի՝ այդ ձախողման հիմնական գործոնը Թուրքիայի կողմից հայ-թուրքական հարաբերությունների ու ղարաբաղյան հակամարտության կարգավորման շաղկապումն է», - ասաց փորձագետը՝ նշելով, որ նման կարծիք ունեն նաև մի շարք այլ թերթեր:
Թուրքագետի խոսքերով՝ թուրքական ԶԼՄ-ները մեծ ուշադրություն են դարձնում ապրիլի 24-ին ԱՄՆ նախագահ Բարաք Օբամայի ելույթին:
Այս տարի ԱՄՆ նախագահ Բարաք Օբաման Օսմանյան կայսրությունում Հայոց ցեղասպանության զոհերի հիշատակին նվիրված հայտարարության մեջ կրկնել է նախորդ տարվա տեքստին մոտ իր խոսքերը: Ոչ մի անգամ չհնչեցնելով «ցեղասպանություն» բառը՝ նա կրկին կոչ է արել Թուրքիային և Հայաստանին շարունակել հարաբերությունների կարգավորմանն ուղղված ջանքերը և նշել է, որ այդ ջանքերի շնորհիվ երկու երկրները միայն ավելի ուժեղ կլինեն: Հայոց ցեղասպանության փաստը ճանաչելու խոստումը Օբաման տվել է նախընտրական արշավի ժամանակ, սակայն դեռ այն չի կատարել:
«Հիմնական ուշադրությունը սևեռված է ԱՄՆ նախագահի հայտարարության այն մասին, որ 1915 թ.-ին եղել են թուրքեր, ովքեր օգնել հայերին փրկվել ջարդերից: Այսպիսով, նրանք եզրակացության են գալիս, որ Օբաման ձգտում է ձերբազատվել թուրքերին մշտապես քննադատող գործչի պիտակից», - ասաց Շաքարյանը:
Բացի այդ, նրա խոսքերով՝ թուրքական ԶԼՄ-ները կարծում են, որ Օբաման իր ուղերձում չի անդրադարձել հայ-թուրքական հարաբերություններին, ինչը, նրանց կարծիքով, կարող է նշանակել Թուրքիայի նկատմամբ ԱՄՆ դիրքորոշման խստացում:
ՀՀ նախագահը ապրիլի 22-ին հրամանագիր է ստորագրել հարաբերությունների հաստատման և զարգացման մասին հայ-թուրքական արձանագրությունների վավերացման գործընթացը կասեցնելու մասին: Արձանագրությունները ստորագրվել են Ցյուրիխի համալսարանում Հայաստանի և Թուրքիայի արտգործնախարարներ Էդվարդ Նալբանդյանի և Ահմեդ Դավութօղլուի կողմից 2009 թ.-ի հոկտեմբերի 10 ին:
Միաժամանակ Սարգսյանը հայտարարել է, որ Հայաստանը ետ չի կանչում արձանագրությունների տակ դրված իր ստորագրությունը և որոշում է ընդունել դեռ դուրս չգալ գործընթացից, քանի որ ցանկանում է պահպանել հարաբերությունների կարգավորման հնարավորությունները և որովհետև ցանկանում է խաղաղություն:-0-
