«Հայոց ցեղասպանությունը հանցագործություն է մարդկության դեմ» հանրահավաքը կանցկացվի Մոսկվայում

«Հայոց ցեղասպանությունը հանցագործություն է մարդկության դեմ» հանրահավաքը տեղի կունենա ապրիլի 24-ին Մոսկվայի «1905-1907թթ.-ի հեղափոխության հերոսների» հուշարձանի մոտ՝ Կրասնոպրեսնենսկայա Զաստավա հրապարակում:

Հանրահավաքը կանցկացնեն «Ռուս-հայկական համագործակցություն» և «Ռուսաստանի հայերի միություն» կազմակերպությունները:

Ինչպես հայտնեց «Ռուս-հայկական համագործակցություն» կազմակերպության նախագահ Յուրի Նավոյանը, հանրահավաքի ժամանակ ելույթ կունենա ՌԴ Պետդումայի փոխնախագահ, ՌԼԴԿ Վլադիմիր Ժիրինովսկին, պատգամավորներ Մաքսիմ Միշչենկոն («Յեդինայա Ռոսիյա» խմբակցություն), Կիրա Լուկյանովան («Սպռավեդլիվայա Ռոսիյա» խմբակցություն), ազգային համայնքների, երիտասարդական շարժումների և հասարակական կազմակերպությունների ղեկավարները:

Հանրահավաքի նպատակն է Թուրքիայի կողմից 1915թ.-ի իրագործած Հայոց ցեղասպանության պաշտոնական ճանաչումը:

Հանրահավաքի անցկացումը համաձայնեցված է Մոսկվայի քաղաքապետարանի  հետ:

Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։

Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ Հայոց ցեղասպանության զոհերի հիշատակի օրը նշվում է ապրիլի 24-ին: -0-