«Կամուրջշին» ՓԲԸ հայկական ընկերությունը հաղթել է Զամանլուի երկաթուղային կամրջի վերականգնման մրցույթում, հաղորդում է «Հարավկովկասյան երկաթուղի» ՓԲԸ-ի մամուլի ծառայությունը:
Ինչպես նշվում է տեղեկատվության մեջ, անցկացված մրցույթի առաջնահերթություններից մեկը Հայաստանի Հանրապետությունից կապալառու ընտրելն էր:
Կամրջի վերականգնման աշխատանքներն իրականացվելու են ներդրումային ծրագրի իրագործման շրջանակներում, որը կապված է երկաթուղային ուղիների վերականգնման և երկաթուղու արհեստական կառույցների առողջացման հետ: Զամանլու ձորով անցնող կամուրջը Հայաստանի ամենահին երկաթուղային կամուրջն է, որը կառուցվել է 1898թ.-ին: Այժմ կամրջամասերի վրայով շարժակազմի փաստացի ծանրաբեռնվածությունը գերազանցում է նորմատիվային ծանրաբեռնվածությունը, ինչը և կամրջի վերականգնման մասին որոշում ընդունելու պատճառը հանդիսացավ:
Վերականգնման ժամանակ նոր հիմքերի վրա կկառուցվեն ուղիների վերին մասերը, կիրականացվի հաղորդակցությունների տեղափոխում, պահակակետի շինարարություն: Վերականգնման աշխատանքների ավարտից հետո նոր ուղիների երկարությունը կկազմի 161 մետր: Ողջ նախագծի նախահաշիվը կազմում է 1,7 միլիարդ դրամ: Զամանլուի կամրջի վերականգնման վերջնաժամեկտը հայտնի կդառնա ՀԿԵ-ի և «Կամուրջշին» ընկերության միջև համապատասխան պայմանագրի ստորագրումից հետո:
Տեղեկատվության մեջ նաև նշվում է, որ ճանապարհային տնտեսությունների վերականգնումը «ՀԿԵ» ՓԲԸ-ի կողմից իրականացվող ներդրումային ծրագրի գերակա խնդիրներից մեկն է: 2010 թ.-ին ՀԿԵ-ի ճանապարհային տնտեսության հատված կուղղվի 685,41 միլիոն ռուբլու ներդրումային ծավալ, ինչը կազմում է 2010 թ.-ի համար նախատեսված բոլոր ներդրումային միջոցների 60 տոկոսը:
«Հայկական երկաթուղիների» կոնցեսիոն կառավարումն իրականացնում է «ՀԿԵ» ՓԲԸ-ն՝ «Ռուսական երկաթուղիներ» ԲԲԸ հարյուրտոկոսանոց դուստրը: ՀԿԵ-ն իր բալանսում ընդունել ՀԵՈՒ շարժակակազմը 2008թ. հունիսի մեկից՝ «Հայկական երկաթուղի» պետական ՓԲԸ-ն 30 տարի ժամկետով փոխանցման, կողմերի փոխադարձ համաձայնությամբ ևս 10 տարի երկարացման իրավունքով 2008թ. փետրվարի 13-ի կոնցեսիոն պայմանագրին համապատասխան։--0—
