Հայոց ցեղասպանությանը նվիրված ցուցահանդես է բացվել Երևանի պատմության թանգարանում
Հայոց ցեղասպանության 95-ամյա տարելիցին նվիրված ցուցահանդես է բացվել Երևան քաղաքի պատմության թանգարանում՝ սփյուռքի նախարարության նախաձեռնությամբ։
«Այս ցուցահանդեսը մի շարք յուրատակություններ ունի։ Այստեղ աշխարհի 10 երկրներից ներկայացված է հայ նկարիչների 60 աշխատանք։ Մենք շատ ուրախ ենք, որ սփյուռքի մեր հայրենակիցները ակտիվ մասնակցել են այս նախաձեռնությանը»,- ցուցահանդեսի բացման ժամանակ ասաց սփյուռքի նախարար Հրանուշ Հակոբյանը։
Ըստ նախարարի՝ ցուցահանդեսին ակտիվ մասնակցել է Ռուսաստանի հայերի միությունը, Լիբանանի հայկական համայնքը։
«Այս ցուցահանդեսով մենք սկսում ենք ցուցահանդեսների շարքը «Մեկ ազգ, մեկ մշակույթ» համահայկական փառատոնի շրջանակներում»,- նշեց Հակոբյանը։
Երկու օրից ողջ հայությունը՝ Հայաստանում, Լեռնային Ղարաբաղում և Սփյուռքում հարգանքի տուրք կմատուցի Հայոց ցեղասպանության զոհերի հիշատակին։ Սակայն ապրիլը ոչ միայն սգո և կորուստների ամիս է, այլև հաղթանակների և վերածննդի։ Եվ մենք դա պետք է ապացուցենք մեր համախմբվածությամբ և միասնականությամբ»,- ավելացրեց նախարարը։
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
