Ռուսաստանի տնտեսական աճը թույլ կտա Հայաստանին ավելի շատ ներդրումներ ներգրավել և ավելացնել արտահանումը. վարչապետ

ԵՐԵՎԱՆ, 22 ապրիլի. /Նովոստի-Արմենիա/. Ռուսաստանում տնտեսական աճի ներկա տեմպերի պահպանումը Հայաստանի համար տնտեսական զարգացման բարենպաստ պայմաններ է ստեղծում, ասել է ՀՀ վարչապետ Տիգրան Սարգսյանը:

«Կանխատեսումներով աճի տեմպերը Ռուսաստանում մինչև տարվա վերջ կպահպանվեն, ինչը մեզ համար ստեղծում է ավելի բարենպաստ միջավայր ինչպես մասնավոր ներդրումների ներգրավման, այնպես էլ արտահանումների տեսակետից», - հինգշաբթի ՀՀ կառավարության նիստի ժամանակ նշել է վարչապետը:

Ինչպես հիշեցրեց Սարգսյանը, երեկ Արժութային միջազգային հիմնադրամը հայտարարեց, որ 2010 թ. կանխատեսումները ստիպված է լինելու փոխել, որովհետև առաջին եռամսյակի արդյունքները կանխատեսումից ավելի դրական են եղել:

ԱՄՀ-ի փորձագետները նախօրեին բարձրացրել են համաշխարհային տնտեսության աճի տեմպերի գնահատականը, և թարմացված տվյալների համաձայն՝ այդ ցուցանիշը 2010 թ.-ին կկազմի 4,2 տոկոս:

Ինչպես կարծում է վարչապետը, դա նշանակում է, որ համաշխարհային տնտեսության մեջ արդեն զգացվում է ռեցեսիայի նվազում:

«Նմանատիպ հայտարարություններով հանդես են եկել նաև Ուկրաինայի և Ռուսաստանի վարչապետերը։ Երևի ձեզանից շատերը հետևել են Վլադիմիր Պուտինի հաշվետվությանը, և նույնպես տրվել է գնահատական, որ ռեցեսիան արդեն ավարտվել է։ Առաջին եռամսյակում և Ուկրաինան, և Ռուսաստանը նույնպես գրանցել են 5 տոկոսանոց աճ։ Հասկանալի է, որ սրանք այն երկրներն են, որոնք մեր տնտեսության վրա էական ազդեցություն ունեն», - նշեց Սարգսյանը:
2010 թ.-ի առաջին եռամսյակի արդյունքների համաձայն՝ Հայաստանում ՀՆԱ-ի 5,5 տոկոսանոց աճ է գրանցվել:-0-