Հայ-թուրքական հարաբերությունները գրեթե փակուղում են գտնվում

Հայ-թուրքական հարաբերությունները գրեթե փակուղում են գտնվում, կարծում է քաղաքագետ, ՀՀ Քաղաքական հետազատությունների ինստիտուտի տարածաշրջանային հարցերի փորձագետ Սերգեյ Շաքարյանցը։

«Ներկայիս հայ-թուրքական հարաբերություններն կախված են օդում, դրանք գրեթե փակուղում են հայտնվել։ Դրանց հետագա ելքը, ավելի շուտ, Թուրքիայից և այն իրադարձություններից կախված կլինի, որոնք կարող են ծավալվել մոտակա ժամանակներս ինչպես Թուրքիայի ներքին, այնպես էլ արտաքին քաղաքական կյանքում»,- երեքշաբթի մամուլի ասուլիսի ժամանակ ասաց Շաքարյանցը։

Ըստ նրա՝ ներկայումս Հայաստանը հայ-թուրքական գործընթացից առանց կորուստների դուրս գալու մեծ ներուժ ունի։

«Հայաստանը էիչ թե շատ ջրից չոր է դուրս եկել։ Մենք ապացուցեցինք, որ գործընթացի ցանկացած ձգձգում և հետաձգում մեր մեղքով չի իրականացվում, հետևաբար, այս գործընթացում մենք առավելություն ունենք»,- ասաց Շաքարյանցը։

Փորձագետը նաև նշեց, որ հայ-թուրքական հարաբերությունների ապագան կախված է գործընթացի կարգավորման գլխավոր գործող անձանց որոշումից։

«Եթե խաղն ինքնուրույն չէ, և դրա կանոնները թելադրվում են, գործընթացը այն հունով կընթանա, որով դրան կուղղորդեն խաղի նախաձեռնողները, իսկ հայ-թուրքական գործընթացում հենց այդպիսին են ԱՄՆ-ն, Ռուսաստանը, ԵՄ-ն, որոնց թվում կարելի է տեսնել նաև Իրանը, որը ձգտում է իր դիրքերն ամրացնել տարածաշրջանում»,-  ընդգծեց նա։

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:

Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:--0--