«Նարեկացի» հայկական ժողովրդական նվագարանների համույթը համերգային շրջագայություն կունենա Եվրոպայում

«Նարեկացի» հայկական ժողովրդական նվագարանների  համույթը «Երկիր Եվրոպա» կազմակերպության հրավերով համերգներով հանդես կգա  Շվեցարիայի և Ֆրանսիայի քաղաքներում, հաղորդում է «Նարեկացի» մշակութային կենտրոնի մամուլի ծառայությունը։

Համերգմերը կկայանան Ժնևում, Ցյուրիխում,  Լիոնում, Թուլուզում, Մոնթելիմարում, Ռոմանում, Սարլայում, Սենթ Շամասիում և Կահորում։

«Ծրագրի շրջանակներում ապրիլի 30-ին Փարիզում կկայանա բարեգործական համերգ, որի ամբողջ հասույթը  կտրամադրվի 2008թ. ավտովթարից տուժած իննամյա Ալեքս Չուֆլաքյանի բուժմանը»,- ասվում է հաղորդագրությունում։

Փոխադարձ վարպետության դասեր կանցկացնեն Ռոմանի երաժշտանոցում, որտեղ եվրոպացի հանդիսատեսը կծանոթանա հայկական ժողովրդական նվագարաններին:

Ապրիլի 24-ին Լուգանոյում կայանալիք համերգը ներկայացնելու է հայ հոգևոր երաժշտության նմուշներ: Այս համերգը նախատեսված է հեռարձակել տեղի իտալական ռադիոյով:

Համերգների ընթացքում կկազմակերպվի նաև ցուցահանդես՝ նվիրված Հայոց ցեղասպանության 95-ամյակին։

«Նարեկացի» մանկապատանեկան ժողովրդական նվագարանների համույթը  ստեղծվել է 2008թ.-ին։ Հայկական ավանդական ամենատարբեր  երաժշտական գործիքներով (դուդուկ, քամանչա, թառ, դափ, քանոն, բլուլ և այլն) նրանք հնչեցնում են Կոմիտասի, Սայաթ-Նովայի, Շերամի և այլ հայտնի կոմպոզիտորների, աշուղների ստեղծագործությունները: -0-