Հայկական բանտերից մեկի բարձրաստիճան աշխատակիցը մեղադրվում է խարդախության մեջ

«Սևան» քրեակատարողական հիմնարկի անվտանգության ապահովման բաժնի պետ Վ. Եղիազարյանը մեղադրվում է խարդախության մեջ, հաղորդում է Հայաստանի գլխավոր դատախազության մամուլի ծառայությունը։ 

Հաղորդագրությունում ասվում է, որ Հատուկ քննչական ծառայությունում ավարտվել է Եղիազարյանի գործով նախաքննությունը: Քրեական գործի նախաքննության օրինականության նկատմամբ հսկողություն իրականացնող դատախազը հաստատել է մեղադրական եզրակացությունը:

Եղիազարյանը մեղադրվում է նրանում, որ, չունենալով անձանց աշխատանքի ընդունելու և այդ հարցում նրանց նպաստելու լիազորություններ, խաբեությամբ և  վստահությունը չարաշահելու եղանակով «Սևան» ՔԿՀ անվտանգության ապահովման բաժնի կրտսեր մասնագետի պաշտոնում նշանակվելու համար իրեն դիմած Քաղսի գյուղի բնակիչ Վ. Վիրաբյանին հավաստիացրել է, թե կարող է այդ հարցում նպաստել` պահանջելով 300 000 դրամ գումար:

Բացի այդ` ՔԿՀ-ի նույն բաժնում աշխատանքի ընդունվելու հարցում աջակցելու համար Վ. Եղիազարյանը Հրազդան քաղաքի բնակիչ Հ. Գրիգորյանից ևս պահանջել և 2009թ. ապրիլի 21-ին իր աշխատասենյակում ստացել է 300 ԱՄՆ դոլար գումար:

Ձեռք բերված ապացույցների հիման վրա` Վ. Եղիազարյանին մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 3-րդ և 5-րդ կետերով (խարդախություն):

Քրեական գործն ուղարկվել է Կոտայքի մարզի ընդհանուր իրավասության առաջին ատյանի դատարան` ըստ էության քննելու համար: -0-