Հնագետները Հայաստանում հայտնաբերել են էնեոլիթի ժամանակաշրջանի հին ոտնամաններ

ԵՐԵՎԱՆ, 16 ապրիլի. /Նովոստի-Արմենիա/. Հնագետները Հայաստանում՝ Արենի քարանձավում էնեոլիթի դարաշրջանի հին ոտնամաններ են հայտնաբերել, այսպես կոչված «չարուխ», որը պատկանում է մ.թ.ա. 3600-3500 թթ., ուրբաթ հայտնեց Հայաստանի Գիտությունների ազգային ակադեմիայի Հնագիտության և ազգագրության ինստիտուտի տնօրեն Պավել Ավետիսյանը «Նովոստի» միջազգային մամուլի կենտրոնում տեղի ունեցած մամուլի ասուլիսի ընթացքում։

Չարուխները կարում էին հում կաշվի կտորից։ Դա խոզի կամ խոշոր եղջերավոր անասունի կաշվից կարված կոշկի մատչելի տեսակ էր։ Ամենաամուր չարուխները կարվում էին տարեց ցլի կաշվից։

Հնագետի խոսքերով, սա բացառապես կարևոր գտածո է՝ ամբողջովին պահպանված արտեֆակտ, ինչը հազվադեպ է լինում հնագիտական պրակտիկայում։

«Հետաքրքիր է այն փաստը, որ գտնված արտեֆակտի և մեր պապերի կրած դրա ժամանակակից անալոգի միջև գործնականում որևէ տարբերություն չկա ոչ որակի և գործվածքի, ոչ էլ պատկերի տեսակետից»,- ասաց Ավետիսյանը։

Նա նշեց, որ դա թույլ է տալիս ամբողջական պատկերացում կազմել մշակման որակի և ձևի վերաբերյալ՝ ներառյալ դրանց արտադրության առանձնահատկությունները։

Ավետիսյանը նշեց, որ սա կոշկի բոլոր տեսակներից հնագույն գտածոն է, որ հայտնաբերվել է Հին Աշխարհի տարածքում։

Հայ հնագետները երկրի հարավում՝ «Արենի-1» քարանձավում, հայտնաբերել են քարե դարի և էնեոլիթի դարաշրջանի բացառիկ համալիր՝ թվագրված մ.թ.ա. 3900-3700 թվականներին։

«Արենի-1» քարանձավի ստուգիչ պեղումների ընթացքում հայտնաբերվել է քարե դարի և էնեոլիթի դարաշրջանի բացառիկ համալիր կավապատ կառույցներով։ Հայտնաբերման բացառիկությունը կայանում էր նրանում, որ շնորհիվ այնտեղ առկա միկրոկլիմայի, օրգանական նյութերը պահպանվել են։ Քարանձավում հայտնաբերվել են կտորի, մորթու և այլ նյութերի հատվածներ, կորիզներ և նույնիսկ խաղողի պտղամիս, ինչպես նաև գանգ՝ ուղեղային հյուսվածքների մնացորդներով։ -0-