Սահմանապահ զորքերի ուղեկալից հեռախոսակապի մալուխ է գողացվել

Հայաստանում գտնվող ՌԴ Սահմանապահ զորքերի ուղեկալից գողացել են հեռախոսակապի մալուխը, գողությունը կատարողները բերման են ենթարկվել, հաղորդում է ՀՀ Ոստիկանության մամուլի ծառայությունը:

Սահմանապահ զորքերի ուղեկալը լուսարձակային հենակետի հետ կապող հեռախոսակապի մալուխի 200 մ երկարության հատվածը գողացվելու մասին ահազանգը  ոստիկանության Բաղրամյանի բաժին է ստացվել չորեքշաբթի:

Հաղորդագրության համաձայն՝ ՌԴ Սահմանապահ զորքերի ծառայողների հետ ձեռնարկված համատեղ օպերատիվ-հետախուզական միջոցառումների շնորհիվ պարզվել է, որ գողությունը կատարել են 22 և 29-ամյա երկու երիտասարդներ: Գողոնն առգրավված է: Կատարվում է հետաքննություն:--0--