EXPO-RUSSIA ARMENIA ռուսական արդյունաբերական ամենամյա երրորդ ցուցահանդեսը կանցկացվի Երևանում 2010 թ.-ի հոկտեմբերի 28-30-ը, տեղեկացրեց «Զարուբեժ-Էքսպո» ընկերության միջազգային համագործակցության և նորարարությունների գծով տնօրեն Անատոլի Նիկոլաևը:
«Ամենայն հավանականությամբ՝ ցուցահանդեսին կմասնակցեն ռուսական շուրջ 70 խոշոր ընկերություններ», - ասաց Նիկոլաևը «Նովոստի-Արմենիա» գործակալությանը տված հարցազրույցում:
Նրա խոսքերով՝ այդ ընկերությունների թվում են «Սուխոյ» ընկերությունը, «Ռուսական երկաթուղի» ԲԲԸ-ն, «Նանոտեխնոլոգիաներ» ռուսական կորպորացիան, «Վերտոլյոտի Ռոսիի», «Ուռալվագոնզավոդ» ընկերությունները:
«Բացի տրանսպորտային ուղղությունից ցուցահանդեսին կներկայացվի նաև լեռնահանքային արդյունաբերությունը, մասնավորապես, «Գոռնիե մաշինի» ՓԲԸ-ն, կրթության ոլորտը, մասնավորապես, ռուսական բուհերը կներկայացնեն իրենց առաջարկները և այն, թե ինչպես են աշխատում Հայաստանում գտնվող իրենց մասնաճյուղերի հետ», - ասաց Նիկոլաևը:
Նա տեղեկացրեց, որ ցուցահանդեսին կներկայացվի նաև քիմիական և սննդի արդյունաբերությունները:
EXPO-RUSSIA ARMENIA երրորդ ցուցահանդեսն ընդգրկում է նաև այնպիսի ոլորտներ, ինչպիսիք են մեքենաշինությունը, մետալուրգիան, էներգետիկան, շինարարությունը, գյուղատնտեսությունն ու պարենը, երկրաբանությունը, տրանսպորտն ու լոգիստիկան, կապն ու հեռահաղորդակցությունը, ՏՏ ոլորտը, նորարարությունները և ներդրումները, բանկերը և ապահովագրական ընկերությունները, բժշկությունը, կրթությունը, զբոսաշրջությունը:
Ցուցահադնեսի կազմակերպիչներն են «Զարուբեժ-Էքսպո» ԲԲԸ-ն և «Մուլտի գրուպ» կոնցեռնը, համակազմակերպիչներն են Խաղաղության հիմնադրամների միջազգային ասոցիացիան և «Ռոսսոտրուդնիչեստվո» դաշնային գործակալությունը:
Ցուցահանդեսը կանցկացվի Ռոուսաստանի առևտրաարդյունաբերական պալատի հովանու ներքո՝ ՌԴ ԱԳՆ-ի, ՌԴ էկոնոմիկայի և զարգացման նախարարության, ՌԴ արդյունաբերության և առևտրի նախարարության, ՌԴ ԿԳՆ-ի, Տրանսպորտի նախարարության, ՀՀ-ում ՌԴ դեսպանատան, Երևանում գտնվող Գիտության և մշակույթի ռուսական կենտրոնի, Ռուսական բանկերի ասոցիացիայի, Ռուսաստանի հայերի միության, ՀՀ կառավարության, ՀՀ էկոնոմիկայի նախարարության, Զարգացման հայկական գործակալության, Հայաստանի խաղաղության կոմիտեի, Հայաստանի արդյունաբերողների և գործարարների միության, Հայաստանի հետ բարեկամության և համագործակցության ռուսական միության աջակցությամբ:
Առաջին և երկրորդ նմանատիպ ցուցահանդեսներն անցկացվել են Երևանում 2008 թ.-ի հոկտեմբերի 31-նոյեմբերի 2--ին և 2009 թ.-ի հոկտեմբերի 29-31-ը:-0-
