Ոստիկանության աշխատակիցների սոցիալական խնդիրները կառավարության ուշադրության կենտրոնում կլինեն. ՀՀ վարչապետ

ՀՀ Ոստիկանության աշխատակիցների սոցիալական խնդիրները կառավարության ուշադրության կենտրոնում կլինեն, հինգշաբթի ոստիկանների մասնագիտական տոնին նվիրված Ոստիկանության կոլեգիայի հանդիսավոր նիստի ժամանակ ասաց ՀՀ վարչապետ Տիգրան Սարգսյանը:

«Կառավարությունը Ոստիկանության աշխատակիցների աշխատանքի նորմալ պայմաններ ստեղծելու համար ջանք չի խնայի»,-  ավելացրեց Սարգսյանը:

Վարչապետը հավաքվածների համար ընթերցել է ՀՀ նախագահ Սերժ Սարգսյանի շնորհավորական ուղերձը՝ ուղղված Ոստիկանության աշխատակիցներին և վետերաններին գերատեսչության հիմնադրման 9-րդ տարեդարձի կապակցությամբ և նրանց շնորհավորել է նաև իր անունից:

Բացի այդ վարչապետը ՀՀ նախագահի կողմից Ոստիկանության մի շարք աշխատակիցների հանձնել է կոչումներ և պետական պարգևներ, ինչպես նաև վարչապետի հուշամեդալներ և պատվոգրեր:

Ոստիկանության աշխատակիցներին շնորհավորել և իրենց գերատեսչական պարգևները, պատվոգրերն ու հուշանվերներն են հանձնել նաև ՀՀ Ազգային անվտանգության խորհրդի քարտուղար Արթուր Բաղդասարյանը, Ազգային անվտանգության ծառայության տնօրեն Գորիկ Հակոբյանը, ՀՀ Զինված ուժերի Գլխավոր շտաբի պետ Յուրի Խաչատուրովը, ՀՀ գլխավոր դատախազ Աղվան Հովսեփյանը, ԱԻ նախարար Արմեն Երիցյանը:

ՀՀ Ոստիկանության աշխատակիցներին և վետերաններին շնորհավորել է նաև Ներքին գործերի և ներքին զորքերի վետերանների խորհրդի պատվավոր անդամ, Խորհրդային Հայաստանի ներքին գործերի նախկին նախարար, գեներալ-լետենանտ Եվգենի Պոտալովը: -0-