Թուրքիան չի կարող ճնշումների լեզվով խոսել Հայաստանի հետ. ՀՀԿ

Թուրքիան չի կարող ճնշումների լեզվով խոսել Հայաստանի հետ, հինգշաբթի ասաց ՀՀԿ խորհրդարանական խմբակցության  անդամ Գագիկ Մելիքյանը՝ մեկնաբանելով Վաշինգտոնում կայացած ՀՀ նախագահ Սերժ Սարգսյանի հանդիպումը ԱՄՆ նախագահ Բարաք Օբամայի և Թուրքիայի վարչապետ Ռեջեփ Թայիպ Էրդողանի հետ:

«Վաշինգտոնյան հանդիպումները հերթական անգամ հաստատեցին, որ Թուրքիան չի կարող ճմշումների և հարկադրանքի  լեզվով խոսել Հայաստանի հետ, և անթույլատրելի է շաղկապել ղարաբաղյան հակամարտության կարգավորումը հայ-թուրքական կարգավորման գործընթացի հետ»,- ասաց պատգամավորը:

Ըստ նրա՝ Երևանը հերթական անգամ հաստատեց, որ չի քննարկի Ցեղասպանության փաստը: «Անհնար է Հայաստանի ստիպել հրաժարվել Հայող ցեղասպանության միջազգային ճանաչումից: Թուրքիայի մտադրությունը՝ հայերին երկու ճամբարի բաժանել, հաջողությամբ չի պսակվել:

Իր հերթին Դաշնակցություն խորհրդարանական խմբակցության անդամ Արծվիկ Մինասյանը՝ նշելով, որ ողջ հայության միասնականությունն ու համախմբվածությունը ХХI դարի մարտահրավերները հաղթահարելու միակ երաշխիքն է, ընդգծեց, որ «գեղեցիկ խոսքերին պետք է հետևեն համապատասխան գործողությունները»:

Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:

ՀՀ նախագահ Սերժ Սարգսյանը ապրիլի 13-ին Վաշինգտոնում մասնակցեց Գլոբալ միջուկային անվտանգության հարցերի գագաթնաժողովին: Վաշինգտոնում նա հանդիպեց ԱՄՆ նախագահ Բարաք Օբամայի, պետքարտուղար Հիլարի Քլինթոնի, Թուրքիայի վարչապետ Ռեջեփ Թայիպ Էրդողանի հետ:--0--