ԵՐԵՎԱՆ, 15 ապրիլի. /Նովոստի-Արմենիա/. ՀՀ վարչապետ Տիգրան Սարգսյանը Երևանում հանդիպում է ունեցել Նոբելյան մրցանակակիր, հայտնի բիոքիմիկոս Աարոն Չենանովերի հետ, ով առաջին անգամ է Հայաստանում՝ Երևանի պետական բժշկական համալսարանի հիմնադրման 90-ամյակի հոբելյանական միջոցառումներին մասնակցելու նպատակով:
«Ողջունելով հյուրին՝ վարչապետը կարևորել է նման այցերը, քանզի դրանք հնարավորություն են տալիս նոր որակի բարձրացնել գիտական համագործակցության մակարդակը», - տեղեկացրեցին ՀՀ կառավարության մամուլի ծառայությունից:
ՀՀ վարչապետը գոհունակությամբ է արտահայտվել նաև գիտության ոլորտում նոր մոտեցումների ընդունման ու կիրառման շուրջ:
Հանդիպմանը մասնակցել են նաև «Լույս» հիմնադրամի գործադիր տնօրեն Ժակլին Կարաասլանյանն ու Ազգային մրցունակության խորհրդի տնօրեն Բեկոր Փափազյանը, ովքեր ներկայացրել են իրենց ղեկավարած հաստատությունները:
Չենանովերն իր հերթին, շնորհակալություն հայտնելով ջերմ ընդունելության համար, ներկայացրել է գիտության զարգացման մասին իր պատկերացումները, խոսել մասնագիտական փորձի մասին, որն ըստ նրա, կարող է օգտակար ու կիրառելի լինել նաև Հայաստանում:
Զրուցակիցները կարևորել են համալսարանների դերը, գիտական նորարարության նշանակությունը, գործարար կապերի ակտիվացման մեխանիզմների ստեղծումն ու կիրառումը, ինչպես նաև ուսանողների և գիտնականների փոխայցելությունները:-0-
