Չարենցավանի ոստիկանության բաժնում երեքշաբթի ինքնասպանություն կատարած քաղաքացի Վահե Խալաֆյանը հոգեպես անհավասարակշռված է եղել, մամուլի ասուլիսի ընթացքում հայտարարեց ՀՀ ոստիկանապետ Ալիկ Սարգսյանը։
«Քաղաքացին 2005 թվականին Հայաստանի պաշտպանության նախարարության կենտրոնական բժշկական հանձնաժողովի կողմից զինվորական ծառայության համար ոչ պիտանի է ճանաչվել, և հանձնաժողովը նրան բաց է թողել «անձի պաթոլոգիական զարգացում, վարքի լուրջ խախտումներ և անդամախեղում» ախտորոշմամբ»։
Սարգսյանը հայտնեց, որ ժամը 16։50 Չարենցավանի ներքին գործերի վարչության շենք բերման են ենթարկվել չորս հոգու, ովքեր ավելի վաղ կողոպտել են քաղաքի խանութներից մեկը 1,5 մլն դոլարի չափով (շուրջ 3 800 դոլար)։
Ըստ նրա, նրանք բոլորը խոստովանական ցուցմունք են տվել, և հայտնաբերվել են մի շարք իրեղեն ապացույցներ։
Սարգսյանն ասաց, որ Խալաֆյանը խոստովանել է, որ խանութի կողոպուտի կազմակերպիչն է եղել, և ինքնասպանության պահին նրա ներկայությամբ որևէ քննչական միջոցառումներ արդեն չեն իրականացվել, նա նստած է եղել պրոֆիլակտիկ ծառայության ղեկավարի աշխատասենյակում։
Նա հայտնեց նաև, որ նույն օրը նշանակվել է ծառայողական հետաքննություն և մանրակրկիտ ուսումնասիրվել են պատահարի մանրամասները։ Ըստ նրա, որևէ մարմնական վնասվածք Խալաֆյանի վրա չի եղել, ոչ ոք ոստիկանությունից նրա վրա ձեռք չի բարձրացրել և նրան ոչ ոք չի վիրավորել։
Ոստիկանության ղեկավարը ցավակցություն է հայտնել Խալաֆյանի հարազատներին, բայց միաժամանակ ընդգծել է, որ նման իրավիճակ կարող էր ստեղծվել ամենուրեք, քանի որ Խալաֆյանն ուներ նման հակվածություններ։
«Ես մեղադրում եմ աշխատակիցներին միայն անուշադրության համար»,- ասաց Սարգսյանը՝ նշելով, որ Ոստիկանությունը բավարար տեխնիկական զինում չունի, որպեսզի արագ պարզի ձերբակալվածների անձն ու տվյալները։ -0-
