ԵՐԵՎԱՆ, 14 ապրիլի. /Նովոստի-Արմենիա/. Հայաստանի նախագահ Սերժ Սարգսյանի և Թուրքիայի կառավարության ղեկավար Ռեջեփ Թայիփ Էրդողանի հանդիպումը հայ-թուրքական հարաբերությունների գործընթացում բարելավման չի հանգեցրել, չորեքշաբթի հայտարարեց թուրքագետ Ռուբեն Մելքոնյանը:
«Թուրքիայի ջանքերով հայ-թուրքական հարաբերությունները նմանվել են տեղում քայլի: Շարունակաբար կրկնվում են նույն գործընթացները, հաստատվում են նույն հայտարարությունները, և որևէ առաջընթաց ներկայում չկա»,- ասաց նա:
Մելքոնյանի խոսքերով, հանդիպման ընթացքում, ի տարբերություն թուրքական կողմի, Հայաստանը հաստատել է իր հստակ դիրքորոշումը հայ-թուրքական հարաբերությունների բարելավման գործընթացի նկատմամբ:
«Հայաստանը հերթական անգամ բարձրաձայն հայտարարել է, որ չի պատրաստվում շաղկապել բարելավման հարցը հայոց ցեղասպանության միջազգային ճանաչման գործընթացի կամ ազգային պետական այլ հարցերի հետ»,- ասաց նա:
Մեկնաբանելով հանդիպման արդյունքները՝ Մելքոնյանը նշեց, որ, ի տարբերություն հայկական կողմի, թուրքական կողմի դիրքորոշման մեջ որոշակիություն չկա:
«Մի քանի օրվա ընթացքում մենք լսեցինք Թուրքիայի հակասական հայտարարությունները: Մեկ խոսվում էր այն մասին, թե Լեռնային Ղարաբաղը պետք է դիտարկվի որպես նախապայման, մեկ էլ, հակառակը, թուրքական կողմը հայտարարում էր, որ պետք չէ շաղկապել հայ-թուրքական հարաբերությունների բարելավման գործընթացը Լեռնային Ղարաբաղի հակամարտության հետ»,- ասաց Մելքոնյանը:
Միաժամանակ նա նշեց, որ Թուրքիայի վարչապետի հայտարարություններում նկատվող որոշակի մեղմացումը կապված է հայոց ցեղասպանության հիշատակի օրվա մոտենալուն: Ապրիլի 24-ից հետո, թուրքագետի խոսքերով, Թուրքիայի կոշտ հռետորությունը կվերսկսվի:
Միաժամանակ, Մելքոնյանի խոսքերով, թուրքական կողմի հայտարարությունների որոշակի մեղմացումն ԱՄՆ-ի համար որոշ հիմքեր է ստեղծում՝ ապրիլի 24-ին «ցեղասպանություն» տերմինը չարտասանելու համար:
Ընդհանուր առմամբ, թուրքագետի խոսքերով, հանդիպման արդյունքներով կարելի է ասել, որ իր հակասական հայտարարություններով «Թուրքիան իրեն ցույց տվեց որպես անվստահելի գործընկեր միջազգային հարաբերություններում»:
Հայաստանի և Թուրքիայի հարաբերությունները բավականին լարված էին մինչև վերջերս, երբ երկու երկրների արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:-0-
