Հայ-թուրքական հարաբերությունները փակուղի են մտել. ընդդիմադիր պատգամավոր

ԵՐԵՎԱՆ, 14 ապրիլի. /Նովոստի-Արմենիա/. Հայ-թուրքական այսօրվա հարաբերությունները փակուղային վիճակում են, կարծում է Հայաստանի Ազգային ժողովի «Ժառանգություն» խմբակցության պատգամավոր Լարիսա Ալավերդյանը:

«Սկզբից էլ ենթադրվում էր, որ հայ-թուրքական արձանագրությունները կհանգեցնեն մի իրավիճակի, որը կարելի է փակուղային անվանել: Արդյունքում այդպես էլ ստացվեց»,- չորեքշաբթի մամուլի ասուլիսի ընթացքում հայտարարեց Ալավերդյանը:

Հայաստանի և Թուրքիայի հարաբերությունները բավականին լարված էին մինչև վերջերս, երբ երկու երկրների արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:

Ալավերդյանի խոսքերով, մինչև այժմ Թուրքիան Հայաստանի նկատմամբ գործել է ճնշման և ուժի մեթոդներով, ինչը «չի կարելի ընկալել որպես օրինական և փայլուն դիվանագիտություն»:

«Թուրքիան փորձում էր հայ-թուրքական գործընթացից շահ ունենալ ամեն հարցում, ինչպես հայոց ցեղասպանության հարցում՝ դրա միջազգային ճանաչման դադարեցման տեսանկյունից, այնպես էլ ղարաբաղյան հակամարտության հարցում: Բայց այսօր ակնհայտ է դառնում, որ այդ մեթոդներով նա ի վիճակի չի իր ուզածին հասնելու»,- նշեց պատգամավորը:

Ալավերդյանը կարծում է, որ ղարաբաղյան հակամարտությունը և Ադրբեջանի հետ համագործակցությունն, ընդհանուր առմամբ, չեն կարող Թուրքիայի համար հայ-թուրքական արձանագրությունների վավերացման և Հայաստանի հետ հարաբերությունների բարելավման խոչընդոտ դառնալ:

Նա պարզաբանեց, որ իրականում թուրքական կողմն օգտագործում է ղարաբաղյան հակամարտությունը բացառապես որպես Հայաստանի վրա ճնշման գործիք՝ բարելավման գործընթացը երկարաձգելու նպատակով: -0-