ԵՐԵՎԱՆ, 13 ապրիլի. /Նովոստի-Արմենիա/. Նոր փուլը հայ-թուրքական հարաբերություններում կարող է սկսվել Հայաստանի, Թուրքիայի և ԱՄՆ-ի ղեկավարության վաշինգտոնյան հանդիպումից հետո, երկուշաբթի «Նովոստի-Արմենիա» գործակալությանն ասաց ՀՀ Ազգային և ռազմավարական հետազոտությունների կենտրոնի գլխավոր փորձագետ, ԼՂՀ նախագահի նախկին խորհրդատու Մանվել Սարգսյանը։
ՀՀ նախագահ Սերժ Սարգսյանը ԱՄՆ նախագահ Բարաք Օբամայի հրավերով ապրիլի 11-ին աշխատանքային այցով մեկնել է Վաշինգտոն` մասնակցելու Գլոբալ միջուկային անվտանգության հարցերով գագաթնաժողովին, որը կանցկացվի ապրիլի 12-13-ը: Հայաստանի նախագահը Վաշինգտոնում երկկողմ հանդիպումներ է ունեցել ԱՄՆ նախագահ Բարաք Օբամայի, պետքարտուղար Հիլարի Քլինթոնի, Թուրքիայի վարչապետ Ռեջեփ Թայիպ Էրդողանի հետ:
«Ամեն ինչ կախված է բացառապես այն բանից, թե որքանով Թուրքիան կկարողանա հրաժարվել իր սկզբունքներից։ Եթե նա այդ բանը չանի, ամեն ինչ նույն փուլում կմնա, նույն միտումներում։ Իսկ եթե հրաժարվի, ապա, բնականաբար, կարող է նոր ուղի սկսվել հայ-թուրքական հարաբերություններում։ Ամեն դեպքում ես կարծում եմ, որ Վաշինգտոնում ինչ-որ նոր փուլ կսկսվի, և կարող են նոր մոտեցումներ սահմանվել, որոնք կփոխեն կողմերի ուժերի դասավորվածությունն ու դիրքորոշումը»,- ասաց Սարգսյանը։
Թուրքիան շարունակում է ձգձգել հայ-թուրքական հարաբերությունների գործընթացի վավերացումը՝ Հայաստանին նախապայմաններ պարտադրելով, որոնց թվում է ղարաբաղյան հարցի կարգավորումը հօգուտ Ադրբեջանի ու հայկական կողմից Հայոց ցեղասպանության միջազգային ճանաչումից հրաժարվելը։
Ըստ փորձագետի՝ այսօր Թուրքիային ամենից շատ հետաքրքրում է ցեղասպանության խնդիրը, և նա կփորձի դադարեցնել ԱՄՆ Կոնգրեսում դրա ճանաչումը։
Միաժամանակ Սարգսյանը չբացառեց, որ Վաշինգտոնում կարող է հայ-թուրքական գործընթացը սրբագրող որոշումներ ընդունված լինեն։
«Այսօր Թուրքիայում սկսել են գիտակցել, որ իրավիճակն ավելի բարդ է, քան թվում է, և որ ամենից շատ նրանք խնդիրներ ունեն ԱՄՆ-ի և արևմտյան աշխարհի, այլ ոչ Հայաստանի և տարածաշրջանի հետ հարաբերություններում»,- ընդգծեց քաղաքագետը։--0--
