Սարգսյանը ցավակցություն է հայտնել ավիավթարի կապակցությամբ, որին զոհ է դարձել Լեհաստանի նախագահ Լեխ Կաչինսկին

Նախագահ Սերժ Սարգսյանն այսօր ցավակցական հեռագիր է հղել Լեհաստանի Հանրապետության Սեյմի մարշալ Բրոնիսլավ Կոմորովսկուն ավիավթարի կապակցությամբ, որին զոհ է դարձել Լեհաստանի նախագահ Լեխ Կաչինսկին, տեղեկացնում է Հայաստանի նախագահի մամուլի ծառայությունը։

«Խորապես ցնցված եմ այսօր առավոտյան տեղի ունեցած ավիավթարից, որի հետևանքով զոհվեցին Լեհաստանի Հանրապետության նախագահը, նրա տիկինը, պատգամավորներ, լեհ բարձրաստիճան պաշտոնյաներ և լեհ ժողովրդի բազմաթիվ արժանավոր զավակներ: Հայաստանի Հանրապետության ժողովրդի և անձամբ իմ անունից խորին ցավակցություն եմ հայտնում Ձեզ, զոհվածների ընտանիքներին և ողջ լեհ ժողովրդին»,- ասվում է Սարգսյանի հեռագրում։

Նախագահը նշել է, որ կիսում է Լեհաստանի ժողովրդի վիշտն ու ցավը և մաղթում է «շուտափույթ ապաքինում ձեր երկիրը պատուհասած այս դաժան փորձությունից, իսկ զոհերի հարազատներին ու մերձավորներին՝ տոկունություն և ոգու արիություն»։ -0-