ԱՄՆ Հայկական երիտասարդական ֆեդերացիան շաբաթ օրը հրատարակել է հայտարարություն, որտեղ կոչ է արվում նախագահ Օբամային՝ հավատարիմ մնալ իր նախընտրական խոստումներին և ճանաչել Հայոց ցեղասպանությունը, հաղորդում է www.asbarez.com-ը։
Հաղորդագրության համաձայն՝ հայտարարությունն ընդգծում է ԱՄՆ հայկական համայնքի վճռականությունը՝ ԱՄՆ նախագահ Բարաք Օբամայի վարչակազմից Հայոց ցեղասպանության ճանաչում պահանջելու հարցում։
Հայտարարությունում ասվում է, որ Հայոց ցեղասպանության 95-ամյակի կապակցությամբ ԱՄՆ բոլոր խոշոր քաղաքներում ապրիլի 24-ին տեղի կունենա 20-րդ դարի սկզբին Թուրքիայի կողմից Հայոց ցեղասպանության ճանաչմանն ուղղված բողոքի ակցիաներ։
Հրատարակությունում նշվում է նաև, որ ժամանակն է ճանաչել Հայոց ցեղասպանությունը, և որ ԱՄՆ Հայկական երիտասարդական ֆեդերացիան հիշում է Բարաք Օբամայի հուսադրող խոսքերը Հայոց ցեղասպանության ճանաչման վերաբերյալ, երբ նա դեռևս ԱՄՆ նախագահի թեկնածու էր։
«Ամերիկան արժանի է մի առաջնորդի, ով ճշմարտությունն է ասում Հայոց ցեղասպանության մասին և վճռականորեն արձագանքում է բոլոր ցեղասպանություններին»,- մեջբերվում են ԱՄՆ նախագահական ընտրությունների նախընտրական քարոզարշավի ժամանակ ասված Օբամայի խոսքերը։
Ապրիլի 24-ին ԱՄՆ հայերը՝ ափից ափ, դուրս կգան փողոց՝ ի նշան բողոքի Հայոց ցեղասպանության չճանաչման դեմ։
«Մենք խնդրում ենք Ձեզ հետևել Ձեր խոստմանը և ճանաչել 1915 թվականի Հայոց ցեղասպանությունը»,- ասվում է հայտարարության մեջ։
1915-1923 թթ. Հայոց ցեղասպանությունը XX դարի առաջին ցեղասպանությունն է, որը կազմակերպել և ծրագրված իրականացրել է երիտթուրքական կառավարությունը։ 1915-1923 թթ.-ին Թուրքիայում Հայոց ցեղասպանության փաստի ճանաչումը սկզբունքային նշանակություն ունի հայ ժողովրդի համար, քանի որ Ցեղասպանությունն իրականացվել է՝ Հայկական հարցը փակելու նպատակով։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
