Միջազգային ավիացիոն կազմակերպությունները դրական են գնահատում Հայաստանի թռիչքային անվտանգությունը, տեղեկացրեց ՀՀ քաղաքացիական ավիացիայի գլխավոր վարչության թռիչքների անվտանգության պետ Սերոբ Կարապետյանը՝ պատասխանելով «Նովոստի-Արմենիա» գործակալության հարցին:
«Հայաստանում քաղաքացիական ավիացիայի թռիչքային անվտանգության վիճակը վերահսկում են մի շարք միջազգային կազմակերպություններ, նրանք անցկացրել են մի շարք ուսումնասիրություններ և աուդիտորական ստուգումներ: Ամենախոշոր ստուգումը 2007 թ.-ին անցկացրել է ԻԿԱՕ-ն (Քաղաքացիական ավիացիայի միջազգային կազմակերպությունը)», - շաբաթ օրը «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ ասաց Կարապետյանը:
Նրա խոսքերով՝ ԻԿԱՕ-ն ստուգման արդյունքում գոհ է մնացել թռիչքային անվտանգության վիճակից:
Ինչպես հիշեցրեց Կարապետյանը, ԻԿԱՕ-ի ստուգումներն անցկացվում են պարբերաբար, և 2007 թ.-ին կազմակերպությունը Հայաստանի թիռչքային անվտանգությանը լավագույն գնահատականն է տվել:
ՔԱԳՎ-ի ներկայացուցիչը տեղեկացրեց, որ 2010 թ.-ին Հայաստանում օդային հաղորդակցության կազմակերպման գործընթացը ստուգել է «Եվրակոնտրոլ» օդային հաղորդակցության եվրոպական կազմակերպությունը:
Կարապետյանը տեղեկացրեց, որ աուդիտի վերջնական զեկույցը դեռ ներկայացված չէ, քանի օր զեկույցի պատրաստումը որոշակի ժամանակ է պահանջում:
«Սակայն նախնական արդյունքների համաձայն՝ նրանք դրական են գնահատել օդային հաղորդակցության կազմակերպման վիճակը», - ասաց Կարապետյանը:
Նա հիշեցրեց, որ Հայաստանը 1992 թ.-ից ԻԿԱՕ-ի լիիրավ անդամ է և տարածաշրջանում առաջինը դարձել է ECAC-ի անդամ (Քաղաքացիական ավիացիայի եվրոպական կոնֆերանս - European Civil Aviation Conference): Կարապետյանը նշեց, որ Հայաստանը համապատասխանում է այդ կազմակերպությունների բոլոր չափորոշիչներին և կատարում է նրանց բոլոր պահանջները: ՔԱԳՎ-ի ներկայացուցիչը տեղեկացրեց, որ 2010 թ.-ին Հայաստանի ավիացիայի ոլորտն անցնում է եվրոպական փաստաթղթերի օգտագործման:
«Դա շատ ժամանակ կպահանջի, քանի որ անհրաժեշտ է ապահովել փաստաթղթերի ճիշտ լրացում: Այս գործընթացը չի նախատեսում սկզբունքային, գլոբալ փոփոխություններ, քանի որ մենք արդեն կիրառում ենք եվրոպական չափորոշիչներ», - նշեց նա:
Հայաստանում գործում է 13 ավիաընկերություն: Հայաստանի ազգային ավիափոխադրողն է «Արմավիա» ավիաընկերությունը:-0-
