Հայ ծանրորդը Եվրոպայի ծանրամարտի առաջնության չեմպիոն է դարձել

Մինսկում ընթացող Եվրոպայի 2010 թ. ծանրամարտի առաջնությանը, 77 կգ քաշայինների պայքարում ասպարեզ դուրս եկած Տիգրան Մարտիրոսյանը բացահայտ առավելությամբ գրավեց առաջին հորիզոնականը:

Ինչպես «Նովոստի –Արմենիա» գործակալությանը հայտնեցին Սպորտի և երիտասարդության հարցերի նախարարության մամուլի ծառայությունից, Պոկում վարժությունում Տիգրանը բարձրացրեց 165 կգ, արձանագրելով լավագույն արդյունք: Հրում վարժությունում նույնպես հայ ծանրորդը առաջինն էր` 195 կգ-ով:

Արդյունքում երկամարտում 360 կգ չգերազանցված ցուցանիշով Տիգրան Մարտիրոսյանը դարձավ Եվրոպայի չեմպիոն: Մարտիրոսյանը նաև օլիմպիական խաղերի բրոնզե մեդալակիր է և աշխարհի փոխչեմպիոն:

Հայաստանի հավաքականի համար սա 2-րդ մեդալն էր: Առաջինը նվաճել էր Սմբատ Մարգարյանը` 56 կգ քաշային կարգում գրանցելով 2-րդ ցուցանիշը:  

Ինչպես ասվում է հաղորդագրությունում, ապրիլի 9-ին,  Եվրոպայի չեմպիոնի կոչման համար պայքարելու են  Հայաստանի 3 ներկայացուցիչներ: Կանանց մրցապայքարում 69 կգ քաշային կարգում ելույթ կունենա Մելինե Դալուզյանը, իսկ տղամարդկանց  մրցապայքարում` 84 կգ քաշայիններ Արա Խաչատրյանը և Գևորիկ Պողոսյանը: -0-