Հայաստանն ապահովագրված չի «ղրղզական» սցենարի կրկնությունից. խորհրդարանական ընդդիմություն

ԵՐԵՎԱՆ, 9 ապրիլի. /Նովոստի-Արմենիա/. Հայաստանն ապահովագրված չի իրադարձությունների զարգացման, այսպես կոչված, «ղրղզական» սցենարի կրկնությունից, կարծում է «Ժառանգություն» խորհրդարանական ընդդիմադիր խմբակցության ղեկավար Ստեփան Սաֆարյանը։

«Հետխորհրդային ցանկացած պետություն, այդ թվում՝ Հայաստանը, ապահովագրված չի նման սցենարից։ Բավական է մեկ կայծ, որպեսզի նման իրադարձություններ բռնկվեն»,- ուրբաթ խորհրդարանական ճեպազրույցների ընթացքում ասաց Սաֆարյանը։

Ընդդիմության բողոքի զանգվածային ակցիաներն ապրիլի 7-ին Ղրղզստանում վերածվել են անկարգությունների։ Ղրղզստանի նախագահ Կուրմանբեկ Բակիևը լքել է մայրաքաղաքը, իսկ ընդդիմությունը ժամանակավոր կառավարություն է ստեղծել։ Ընդդիմության ներկայացուցիչները հայտարարել են ոստիկանության, բանակի և սահմանապահ ծառայության՝ իրենց կողմն անցնելու մասին։ Բախումների ողջ ընթացքում տուժել է գրեթե 1,5 հազար մարդ, 75-ը՝ զոհվել։

Ինչպես նշեց Սաֆարյանը, հետխորհրդային երկրների հեղափոխությունների արմատները տանում են դեպի 1990-ականների սկիզբ, իսկ 2000-ականների առաջին կեսին «գունավոր հեղափոխությունները» բռնկվում են նոր ուժով։

Նրա կարծիքով, նման հեղափոխությունները տեղի են ունենում հետխորհրդային այն երկրներում, որոնք չկարողացան հաղթահարել կլանային-օլիգարխիկ ավանդույթները։

«Դաշնակցություն» խորհրդարանական խմբակցության անդամ Արծվիկ Մինասյանն իր հերթին նշեց, որ Ղրղզստանի և Երևանի մարտյան դեպքերն ընդհանուր ոչինչ չունեն, քանի որ Հայաստանում հեղափոխական իրավիճակ չի եղել։

Ինչպես նշեց Մինասյանը, հեղափոխության համար անհրաժեշտ է հասարակության պահանջը, դրա անհրաժեշտության գիտակցումը և հեղափոխությունից հետո ներդրման ենթակա արժեհամակարգի առկայությունն ու,. Իհարկե, համապատասխան առաջնորդ։

«Մեզ մոտ դա չի եղել, եղել է միայն ժողովրդին մոլորեցման տանելու փորձ»,- ասաց նա։

2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվեցին անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվեց տասը և վիրավորվեց 265 քաղաքացի։-0-