Ղրղզստանի իրադարձությունները չեն կարող կրկնվել Հայաստանում, կարծում է Հայաստանի Հանրապետական կուսակցության խորհրդարանական խմբակցության ղեկավար Գալուստ Սահակյանը։
«Նման իրադարձությունները չեն համապատասխանում մեր մտածելակերպին։ Ըստ էության Ղրղզստանում քաղաքացիական պատերազմ է սկսվել»,- ուրբաթ խորհրդարանական ճեպազրույցների ընթացքում ասաց Սահակյանը։
Ընդդիմության բողոքի զանգվածային ակցիաներն ապրիլի 7-ին Ղրղզստանում վերածվել են անկարգությունների։ Ղրղզստանի նախագահ Կուրմանբեկ Բակիևը լքել է մայրաքաղաքը, իսկ ընդդիմությունը ժամանակավոր կառավարություն է ստեղծել։ Ընդդիմության ներկայացուցիչները հայտարարել են ոստիկանության, բանակի և սահմանապահ ծառայության՝ իրենց կողմն անցնելու մասին։ Բախումների ողջ ընթացքում տուժել է գրեթե 1,5 հազար մարդ, 75-ը՝ զոհվել։
«Չեմ կարծում, թե աշխարհում տեղի ունեցող իրադարձությունները կարող են համընկնել մեր իրողությունների հետ։ Սա վկայում է, որ Հայաստանի պետական և ազգային շահերը բոլորովին այլ են»,- ասաց Սահակյանը։
2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվեցին անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվեց տասը և վիրավորվեց 265 քաղաքացի։-0-
