Հոկեյի աշխարհի առաջնության 3-րդ դիվիզիոնի խաղերը կանցկացվեն ապրիլի 14-18-ը Երևանում

Տափօղակով հոկեյի աշխարհի առաջնության 3-րդ դիվիզիոնի խաղերը կանցկացվեն ապրիլի 14-18-ը Երևանում, հաղորդեց հանրապետության սպորտի և երիտասարդության հարցերի նախարար Արթուր Պետրոսյանը:

«Երևանում խաղերի կազմակերպման համար Սպորտի և երիտասարդության հարցերի նախարարությանը կառավարության պահուստային հիմնադրամից 15 մլն դրամ (37 հազար դոլար) կտրամադրվի»,- հինգշաբթի կառավարության նիստի ժամանակ հաղորդեց Պետրոսյանը:

Ըստ նրա՝ միջոցները կփոխանցվեն Կարեն Դեմիրճյանի անվան մարզահամերգային համալիրի սահադաշտի վարձակալության և մրցույթները բարձր մակարդակով  կազմակերպելու համար:

Ինչպես նշում է Սպորտի և երիտասարդության հարցերի նախարարությունը, վերջին տարիներին հայ հոկեյիստները բարելավել են իրենց արդյունքները, ինչի մասին  վկայում է 2006թ-ի Աշխարհի առաջնության 3-րդ դիվիզիոնում հոկեյի հայկական հավաքականի 3-րդ տեղը զբաղեցնելը և երիտասարդական հավաքականի հաջողությունները:

Սպորտի նախարարը կարծում է, որ Երևանում 3-րդ դիվիզիոնի խաղերի անցկացումը կնպաստի Հայաստանում հոկեյի զարգացմանը, միջազգային ասպարեզում կբարձրացնի հայ սպորտսմենների վարպետությունը և երկրի սպորտային հեղինակությունը:

Նաև մրցումների արդյունքում կձևավորվի տափօղակով հոկեյի

Հայաստանի ազգային հավաքական, որը կպայքարի 2014թ.-ին Սոչիում կայանալիք  Ձմեռային օլիմպիադային մասնակցելու համար: -0-