Հայաստանի խորհրդարանը վավերացրեց «Միջուկային ահաբեկչական գործողությունների դեմ պայքարի մասին» միջազգային կոնվենցիան

Չորեքշաբթի Հայաստանի խորհրդարանը վավերացրեց «Միջուկային ահաբեկչական գործողությունների դեմ պայքարի մասին»  միջազգային կոնվենցիան (կից առարկությամբ), որն ընդունվել էր 2005թ.-ի ապրիլի 13-ին Նյու Յորքում:

Ինչպես հարցը ներկայացնելիս նշեց ՀՀ Ազգային անվտանգության ծառայության պետի տեղակալ Ռոմիկ Հարությունյանը, Հայաստանն արդեն վաղուց է միացել բոլոր միջազգային կոնվենցիաներին, որոնք կապված են միջուկային անվտանգության հարցերի հետ՝ այդկերպ արձագանքելով հնարավոր սպառնալիքներին:

«Հայաստանի միացումը տվյալ կոնվենցիային վկայում է, որ ՀՀ-ն միջուկային ահաբեկչական գործողությունների դեմ պայքարում միանում է այն երկրներին, որոնք միջուկային էներգիան օգտագործում են խաղաղ նպատակներով»,- ասաց Հարությունյանը:

Այդ թվում նա նաև նշեց, որ քանի որ տվյալ փաստաթղթի վավերացման ժամանակ ադրբեջանական կողմն այն ընդունեց առարկությամբ, որտեղ աղավաղված ձևով ներկայացվեց ղարաբաղյան հակամարտության իրավիճակը և ներկայացվեց՝ իբրև այն օգտագործվելու է միջուկային ահաբեկչության տարածման նպատակով, հայկական կողմն անհրաժեշտ գտավ տվյալ փաստաթուղթը նույնպես առարկությամբ հաստատել:

Հայկական կողմի առարկության մեջ մասնավորապես ասվում է, որ «Ադրբեջանն խեղաթյուրում է ղարաբաղյան հակամարտության էությունը, որն առաջացել է ղարաբաղյան ժողովրդի ազատ կամարտահայտության ճնշմամբ»:

Ինչպես նշվում է խորհրդարանական առարկություններում, «Ադրբեջանի կողմից անցկացվող քաղաքական էթնիկ զտումների հետևանքով առաջացավ ռազմական ագրեսիա ԼՂ-ի ժողովրդի դեմ: Արդյունքում ԼՂ-ի տարածքների մի մասը օկուպացվել են Ադրբեջանի կողմից»:
 
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-