ԵՐԵՎԱՆ, 7 ապրիլի. /Նովոստի-Արմենիա/. Ղարաբաղյան հակամարտության կարգավորման գլխավոր խնդիրը նախկինի պես մնում է Լեռնային Ղարաբաղի կարգավիճակի հարցը, չորեքշաբթի մամուլի ասուլիսի ժամանակ հայտարարեց ՀՀ ԱԳ նախարար Էդվարդ Նալբանդյանը:
«Առանց ղարաբաղյան խնդրի գլխավոր հարցի՝ ԼՂՀ կարգավիճակի որոշման, դժվար է խոսել այլ խնդիրների լուծման մասին: Կարգավորման գլխավոր հարցը նախկինի պես մնում է Լեռնային Ղարաբաղի ինքնորոշման իրավունքի ճանաչումն ու իրագործումը», - ասաց ՀՀ ԱԳ նախարարը:
Նալբանդյանն ավելացրեց, որ հակամարտության կարգավորման բանակցությունների սեղանին դրված են 2007 թ.-ի նոյեմբերին ներկայացված Մադրիդյան սկզբունքները, և դրանք բանակցությունների հիմքն են:
«Մինսկի խմբի համանախագահները շարունակում են առաջարկել հակամարտության կարգավորման աշխատանքային տարբերակներ, և դա տեղի կունենա մինչև չհաջողվի մերձեցնել կողմերի դիրքորոշումները», - ընդգծեց նախարարը:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
