ԱՄՆ, Թուրքիայի և Հայաստանի ղեկավարների հանդիպման արդյունքը կախված է Թուրքիայի՝ Հայոց ցեղասպանության հարցում իր դիրքորոշումը փոխելու պատրաստակամությունից. փորձագետ
ԵՐԵՎԱՆ, 6 ապրիլի. /Նովոստի-Արմենիա/. ԱՄՆ, Թուրքիայի և Հայաստանի ղեկավարների հնարավոր հանդիպումը հայ-թուրքական կարգավորման գործընթացի բեկման չի հանգեցնի, մինչև Թուրքիան Հայոց ցեղասպանության հարցում չփոխի իր սկզբունքային վերաբերմունքը, երեքշաբթի մամուլի ասուլիսի ժամանակ հայտարարեց Երևանի պետական համալսարանի պրոֆեսոր, «Քաղաքական հետազոտությունների ակադեմիա» հասարակական կազմակերպության նախագահ Ալեքսանդր Մանասյանը։
Վաշինգտոնի գագաթնաժողովին հրավիրված են Թուրքիայի վարչապետ Ռեջեփ Թայիպ Էրդողանն ու ՀՀ նախագահ Սերժ Սարգսյանը, ով նաև պետք է հանդիպի ԱՄՆ նախագահ Բարաք Օբամայի հետ: Բացառված չէ, որ գագաթնաժողովի շրջանակներում կարող է տեղի ունենալ Օբամա-Էրդողան-Սարգսյան եռակողմ հանդիպումը:
«Քանի դեռ Թուրքիան Ցեղասպանության հարցում իր սկզբունքային վերաբերմունքը չի փոխել, այդ հանդիպումներից գործընթացի բեկում չի կարելի ակնկալել»,- ասաց Մանասյանը։
Բացի այդ նա նշեց, որ հանդիպումների արդյունքները նաև կախված են ԱՄՆ-ի դիրքորոշումից և նաև Թուրքիայի նկատմամբ Վաշինգտոնի ցուցաբերած ճնշումից։
Ըստ փորձագետի՝ Թուրքիան մենթալ, սոցիոլական և քաղաքական առումներով բացառելով Ցեղասպանությունը՝ մնում է ցեղասպան պետություն։ Իսկ հայ-թուրքական կարգավորման գործընթացը թույլ տվեց համոզվել, որ Թուրքիան չի փոխվել։
Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
1915-1923 թթ. Հայոց ցեղասպանությունը XX դարի առաջին ցեղասպանությունն է, որը կազմակերպել և ծրագրված իրականացրել է երիտթուրքական կառավարությունը։ 1915-1923 թթ.-ին Թուրքիայում Հայոց ցեղասպանության փաստի ճանաչումը սկզբունքային նշանակություն ունի հայ ժողովրդի համար, քանի որ Ցեղասպանությունն իրականացվել է՝ Հայկական հարցը փակելու նպատակով։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
